اسرائیلی فوج کی جانب سے مختلف حیلوں بہانوں کے تحت جنگی تیاریوں کے لیے فوجی مشقوں کا سلسلہ روز مرہ کے اعتبار سے جاری رہتا ہے۔ ابھی دو روز قبل اسرائیلی فوج نے غزہ پر حملے کے تناظر میں جنگی مشقیں ختم کی تھیں کہ اس کےساتھ حیاتیاتی اور بائیولوجیکل ہتھیاروں کے حملوں کے تناظر میں مشقیں شروع کر دی گئی ہیں۔
اسرائیلی میڈیا پرآنے والی رپورٹ کے مطابق صہیونی فوج نے یہ جنگی مشقیں بدھ کے روز شروع کیں جو آج جمعرات کو بھی جاری رہیں گی۔ فوجی مشقوں کو”بیالوجیکل دہشت گردی” کا نام دیا گیا ہے۔
ان مشقوں میں فوج کو حیاتیاتی ہتھیاروں کے حملوں سے نمٹنے اور ان سے بچنے کے مختلف طریقے سکھائے گئے۔ اس کے علاوہ فوج کو اسرائیلی ریاست کو کسی بھی بیرونی حملے سے دفاع کے لیے حیاتیاتی ہتھیاروں کے استعمال کے بھی مختلف گر بتائے جا رہے ہیں۔
ان فوجی مشقوں کے لیے شمالی فلسطین کے شہر الناصرہ، نتصرات عیلیت، العفولہ ارو طبریا کے مقامات مخصوص کیے گئے ہیں جہاں سے قرب و جوار میں موجود فلسطینی آبادیوں کو ان علاقوں میں داخلے سے کئی روز قبل ہی منع کر دیا گیا تھا۔
فوجی مشقوں میں اسرائیلی فوج کے پیراملٹری دستے، ملٹری پولیس اور رضاکار فوج کےاہلکار بھی شریک ہیں۔
خیال رہے کہ اسرائیلی فوج نےجنگی مشقیں ایک ایسے وقت میں تیز کی ہیں جب حال ہی میں صہیونی حکومت کی جانب سے باربار یہ اشارے دیے گئے ہیں کہ عرب ممالک میں جاری انقلابات کی تحریکوں کے باعث اسرائیل کو کسی بھی عرب ملک کے ساتھ جنگ لڑنا پڑ سکتی ہے۔