فلسطینی شہرغزہ کی پٹی میں اسرائیلی فوج کے ایک میزائل حملے میں بیت المقدس مجاہدین مجلس شوریٰ کے کمانڈر ھشام علی السعیدنی المعروف ابو الولید المقدسی جام شہادت نوش کرگئے۔
مرکزاطلاعات فلسطین کے مطابق صہیونی فوج نے السعیدنی کو ہفتے کی شام شمالی غزہ کے علاقے جبالیا میں ہوائی جہاز کے ذریعے ایک میزائل سے نشانہ بنایا گیا۔ السعیدنی اور اس کا ساتھ موٹرسائیکل پرسوار تھے۔ دونوں افراد میزائل حملے میں شدید زخمی ہوئے، جنہیں بعد ازاں الشفاء اسپتال لے جایا گیا جہاں وہ کچھ ہی دیرکے بعد زخموں کی تاب نہ لاتے ہوئے چل بسے۔
غزہ میں وزارت صحت کے ترجمان ڈاکٹر اشرف قدرہ نے ’’پی آئی سی‘‘ کو بتایا کہ میزائل حملے میں مجلس شوریٰ المجاہدین کے دو کمانڈر شہید اور راہ گیر بچہ زخمی ہوا ہے۔
ایک دوسرے ذرائع کا کہنا ہے کہ جبالیا کے مقام پرصہیونی فوج کے ایک جنگی طیارے نے فلسطینی کمانڈروں پردو میزائل حملے کیے۔ پہلے حملے میںوہ محفوظ رہے لیکن دوسرے حملے میں انہیں شہید کردیا گیا۔
ادھر مشرقی غزہ میں صہیونی فوج نے اسلامی تحریک مزاحمت حماس کے عسکری ونگ القسام بریگیڈ کے ایک مرکز پربھی بمباری کی ہے تاہم اس میں کسی قسم کے جانی نقصان کی اطلاعات نہیں مل سکی ہیں۔
بشکریہ: مرکز اطلاعات فلسطین