مغربی کنارے میں اسرائیلی فوج کی بڑے پیمانے پر گرفتاری مہم، متعدد فلسطینی حراست میں

مقبوضہ مغربی کنارہ – (روزنامہ قدس ـ آنلائن خبر رساں ادارہ) قابض اسرائیلی فوجنے آج بدھ کی صبح مغربی کنارے کے مختلف علاقوں میں بڑے پیمانے پر گرفتاریوں کی مہم چلائی، جس کا مرکز الخلیل، نابلس اور بیت لحم کے اضلاع رہے۔ اس کارروائی کے دوران ایک معمر شخص اور متعدد خواتین کو گرفتار کیا گیا۔

ضلع الخلیل میں قابض فوج نے شہر پر دھاوا بول کر ایک خاتون سمیت سات شہریوں کو گرفتار کر لیا۔ گرفتار ہونے والوں میں عامر حمدی الجبرینی، وسیم سعید زلوم، عبداللہ شکری الجنیدی، 66 سالہ خاتون عطاف محمد رضوان بدر، اور حلحول قصبے سے ڈاکٹر ودیع محمود البربراوی شامل ہیں۔

الخلیل کے مشرق میں بیت عینون کے داخلی راستے پر قابض فورسز نے ڈرائیوروں یزن یوسف الفروخ اور ایاد حامد المطوّر کو ان کی گاڑی سے اتار کر گرفتار کر لیا۔

قابض فوج نے الخلیل شہر میں کئی گھروں کی تلاشی لی، جن میں عبداللہ الجنیدی کا گھر بھی شامل ہے، جہاں سے انہوں نے ایک ’کیا‘ کار اور گھر سے بچوں کے کھلونے قبضے میں لے لیے۔ قابض فوج نے الخلیل کے داخلی راستوں، قصبوں، دیہاتوں اور پناہ گزین کیمپوں پر کئی عسکری چوکیاں قائم کیں اور آہنی گیٹ، کنکریٹ کے بلاکس اور مٹی کے تودوں کے ذریعے کئی مرکزی اور ذیلی راستے بند کر دیے۔

اسی تناظر میں آج بدھ کی صبح قابض اسرائیلی فورسز نے ضلع نابلس سے دو خواتین کو گرفتار کیا۔ مقامی ذرائع کے مطابق قابض فوج نے نابلس شہر میں گھس کر مختلف علاقوں میں کئی گھروں پر چھاپے مارے اور شمالی پہاڑ کے علاقے جسر التیتی سے میسر الفقیہ کو گرفتار کر لیا۔

ذرائع نے مزید بتایا کہ قابض فوج نے نابلس کے مشرق میں واقع گاؤں بیت دجن میں ایک گھر پر چھاپہ مار کر فاتن حنایشہ کو گرفتار کیا اور ان کا ذاتی کمپیوٹر قبضے میں لے لیا۔ فاتن حنایشہ ایک فلاحی تنظیم کے لیے کام کرتی ہیں۔

ایک اور واقعے میں قابض فورسز نے نابلس شہر کے جنوب میں واقع قصبے کفر قلیل پر دھاوا بولا، متعدد گھروں کی تلاشی لی، گھر کا سامان بکھیر دیا اور عقاب عامر کے گھر سے نقدی رقم بھی چھین لی۔

آج بدھ کی صبح قابض اسرائیلی فورسز نے بیت لحم کے جنوب میں واقع الدہیشہ پناہ گزین کیمپ سے ایک معمر صحافی اور ایک نوجوان کو گرفتار کر لیا۔ مقامی ذرائع نے بتایا کہ قابض فوج نے کیمپ میں داخل ہو کر کئی گھروں پر چھاپے مارے اور صحافی حسن محمود عبدالجواد الفرارجہ (72 سالہ) اور نوجوان ادھم جمال ابراہیم فراج کو گرفتار کر لیا۔

اسی دوران قابض اسرائیلی فورسز نے بیت لحم کے جنوبی دیہاتوں کے داخلی راستوں، خاص طور پر مراح رباح اور المنشیہ کے راستوں کو آہنی گیٹوں سے بند کر دیا۔ یہ راستے بیت لحم کے دیہی علاقوں سے شہر کے مرکز تک پہنچنے کا واحد ذریعہ ہیں اور یہی وہ رابطہ کاری کا مرکز ہے جو الخلیل اور بیت لحم شہروں کو آپس میں جوڑتا ہے۔