(روز نامہ قدس ۔آنلائن خبر رساں ادارہ ) ذرائع کا کہنا ہے کہ اسرائیلی وزارت صحت کے سینئر عہدیدار کی جانب سے بے بنیاد بیان پر دونوں ممالک کے درمیان حالیہ قائم ہونے والے تعلقات کشیدگی کا شکار ہوگئے تھے تاہم اسرائیل نے امارات سے باضابطہ معافی مانگ لی۔
غیر ملکی خبر رساں ادارے میں صیہونی ریاستی ذرائع کے حوالے سے شائع کردہ رپورٹ کے مطابق متحدہ عرب امارات نے غیر قانونی صیہونی ریاست کی وزارت صحت کے اہم عہدیدار اور اسرائیل میں صحت عامہ کی خدمات کی سربراہ ڈاکٹر شیرون ایلروئی پرائس کے بیانات کے بارے میں وضاحت طلب کی ہے جس میں انہوں نے اسرائیل میں عالمی وباء کورونا وائرس سے ہونے والی ہلاکتوں کو اور اس میں تیزی سے ہونے والے اضافے کو دبئی جانے والی پروازوں کے تسلسل سے جوڑ دیا ہے۔
غیر قانونی صیہونی ریاست اسرائیل نے ڈاکٹر شیرون ایلروئی پرائس کے بیان پر متحدہ عرب امارات سے سرکاری طور پر معافی مانگی ہےاور اس امید کا اظہار کیا ہے کہ اس معافی سے دونوں ممالک کے مابین سفارتی تعلقات کشیدگی کا شکار نہیں ہوں گے۔