(روزنامہ قدس ۔آن لائن خبر رساں ادارہ) ملائیشیا کے وزیراعظم کی دعوت پر حماس کا اعلیٰ اختیاراتی وفد عالمی اسلامی سربراہ کانفرنس میں شرکت کیلئے کولالمپور پہنچ گیا ہے۔
مقبوضہ فلسطین میں اسرائیلی مظالم کے خلاف برسرپیکار اسلامی تحریک مزاحمت’حماس’ کے ترجمان کی جانب سے جاری بیان میں بتایا گیا ہے کہ حماس کے سیاسی شعبے کے سربراہ اسماعیل ھنیہ کی قیادت میں جماعت کا اعلیٰ اختیاراتی وفد کولالمپور میں ہونے والی عالمی اسلامی سربراہ کانفرنس میں ملائیشیا کے وزیراعظم مہاتیر محم کی دعوت پر شرکت کیلئے گزشتہ روز ملائیشیاپہنچ گیا ہے ۔
بیان میں بتایا گیا ہے کہ حماس کے دورہ ملائیشیا پرجانے والے رہ نماؤں میں جماعت کے سیاسی شعبے کے سابق ارکان موسیٰ ابو مروزق، خلیل الحیہ، عزت الرشق حسام بدران، سامی ابو زھری، اسامہ حمدان اور جمال عیسیٰ شامل ہیں۔
واضح رہے کہ ملائیشیا کی میزبانی عالمی اسلامی سربراہ کانفرنس کا انعقاد کیا جا رہا ہے جس میں ترکی کے صدر رجب طیب ایردوآن، امیر قطر الشیخ تمیم بن حمد آل ثانی، ایران کے صدر حسن روحانی، ملائیشیا کے وزیراعظم مہاتیر محمد اور انڈونیشیا سمیت دیگر مسلم ممالک کے سربراہان شرکت کریں گے ۔