(روز نامہ قدس ۔آنلائن خبر رساں ادارہ) غزہ میں سرکاری میڈیا آفس نے تصدیق کی ہے کہ گزشتہ 72 گھنٹوں کے دوران غیر قانونی صیہونی ریاست اسرائیل کی دہشتگردانہ کارروائیوں کے نتیجے میں غزہ میں شہید ہونے والوں کی تعداد 591 تک پہنچ چکی ہے جس میں زیادہ تر بچے اور خواتین شامل ہیں۔
غیر قانونی صیہونی فوج نے منگل کی صبح سے غزہ پر متعدد مرتبہ اجتماعی قتل عام کی دہشتگردانہ کارروائیاں کرچکی ہے، جس میں شہریوں کے گھروں کو بغیر کسی وارننگ کے نشانہ بنایا گیا۔ اس جارحیت کے نتیجے میں 591 فلسطینی شہید اور 1042 زخمی ہو چکے ہیں۔
میڈیا کے دفتر سے جاری کردہ بیان میں مزید کہا کہ متاثرین کی ایک بڑی تعداد ملبے کے نیچے دب چکی ہے، جبکہ امدادی ٹیمیں ایندھن کی کمی اور سول ڈیفنس کے آلات کے مفلوج ہونے کی وجہ سے ان تک رسائی حاصل کرنے میں ناکام ہیں۔
سرکاری میڈیا آفس نے اس بات کی نشاندہی کی کہ اعداد و شمار کے مطابق اس دوران شہید ہونے والوں میں بچوں، خواتین اور بزرگوں کی تعداد 70 فیصد سے زائد ہے، جو اس بات کا ثبوت ہے کہ غیر قانونی صیہونی فوج شہریوں کو براہ راست نشانہ بنانے کی نسل کشی کے منظم جرم میں ملوث ہے۔
انہوں نے مزید کہا کہ یہ وحشیانہ جارحیت امریکی حمایت اور بین الاقوامی برادری کی شرمناک خاموشی کے درمیان غیر قانونی صیہونی ریاست کے ارادوں کا عکاس ہے، جو غزہ میں نسل کشی کو مکمل کرنے کی کوشش کر رہی ہے۔
بیان میں غیر قانونی صیہونی فوج کی جانب سے نہتے شہریوں کے قتل عام کی شدید مذمت کی گئی اور اقوام عالم و انسانی حقوق کی تنظیموں سے مطالبہ کیا گیا کہ وہ ان جرائم کی مذمت کریں اور ان کی روک تھام کے لیے فوری اقدامات کریں۔