تل ابیب – (روزنامہ قدس ـ آنلائن خبر رساں ادارہ) قابض اسرائیلی فوج نے پیر کی شام اعلان کیا کہ خلیج عقبہ میں بحیرہ احمر کے اندر ایک امریکی ڈسٹرائر جہاز اور قابض اسرائیل کے جنگی بحری جہازوں کے درمیان مشترکہ فوجی مشقیں کی گئی ہیں۔ یہ اقدام خطے میں امریکی عسکری سرگرمیوں میں تیزی کے تناظر میں سامنے آیا ہے جہاں ایران کے ساتھ بڑھتی کشیدگی پس منظر میں موجود ہے۔
قابض اسرائیلی فوج نے اپنے بیان میں کہا کہ یہ مشقیں گذشتہ اتوار کو انجام دی گئیں جو قابض اسرائیل کی بحریہ اور امریکی پانچویں بحری بیڑے کے درمیان تعاون کا حصہ تھیں۔ بیان میں دعویٰ کیا گیا کہ امریکی ڈسٹرائر جہاز ایلات بندرگاہ پر ایک معمول کی اور پہلے سے طے شدہ دورے کے تحت لنگر انداز ہوا تھا اور اسے دونوں فریقوں کے درمیان جاری ہم آہنگی کا مظہر قرار دیا گیا۔
اسی تناظر میں فلسطینی تجزیہ نگار معین الکحلوت نے سوال اٹھایا کہ آخر کس نے امریکی فوج کو یہ جواز دیا کہ وہ اپنے جنگی طیاروں، ٹینکوں، طیارہ بردار جہازوں، جنگی بیڑوں اور دسیوں ہزار فوجیوں کے ساتھ ہمارے خطے میں ہمارے بحیرہ روم میں ہماری زمینوں پر اور ہماری علاقائی سمندری حدود کے قریب موجود ہو۔
قابض اسرائیل کے بیان میں یہ بھی کہا گیا کہ یہ دورہ اور فوجی تربیت امریکہ اور قابض اسرائیل کی افواج کے درمیان گہرے تعاون کی عکاسی کرتی ہے ایسے وقت میں جب پورا خطہ باہمی عسکری الرٹ کی کیفیت سے دوچار ہے۔
اسی حوالے سے امریکی مرکزی کمان سینٹ کام نے اعلان کیا کہ امریکی تباہ کن جہاز یو ایس ایس ڈیلبرٹ ڈی بلاک نے بحیرہ احمر میں قابض اسرائیل کے ایک جنگی جہاز کے ساتھ بحری مشقیں کیں۔ سنتکوم کے مطابق یہ جہاز اتوار کے روز ایلات بندرگاہ سے ایک طے شدہ دورے کے بعد روانہ ہوا۔
سینٹ کام نے مزید کہا کہ یہ دورہ واشنگٹن اور تل ابیب کے درمیان بحری شراکت داری کا اظہار ہے اور اس عزم کی عکاسی کرتا ہے جس کے تحت دونوں فریق بحیرہ روم خلیج عقبہ اور بحیرہ احمر میں نام نہاد سکیورٹی کو مضبوط بنانے کے لیے کوشاں ہیں۔
امریکی تباہ کن جہاز ڈیلبرٹ ایلات شہر سے روانہ ہو کر بحیرہ احمر کی جانب بڑھ چکا ہے تاکہ امریکی بحریہ کی اضافی نفری میں شامل ہو سکے۔ یہ میزائل بردار جنگی جہاز بحر عرب اور اس کے گرد و نواح کے پانیوں میں موجود طیارہ بردار بحری بیڑے ابراہام لنکن اسٹرائیک گروپ کے ساتھ امریکی پانچویں بحری بیڑے کی قیادت میں شامل ہوگا۔
یہ تمام عسکری سرگرمیاں ایسے وقت میں سامنے آئی ہیں جب امریکہ نے گذشتہ ہفتوں کے دوران مشرق وسطیٰ میں اپنی فوجی موجودگی میں نمایاں اضافہ کیا ہے۔ اس کے تحت مزید تباہ کن جنگی جہاز بحری یونٹس اور فضائی و بحری اڈوں کو مضبوط بنایا گیا ہے جو ایران پر دباؤ بڑھانے کی ایک تدریجی حکمت عملی کا حصہ ہے۔ یہ سب ایران کے جوہری پروگرام اور اس کے علاقائی کردار پر بڑھتے اختلافات کے سائے میں ہو رہا ہے۔
واشنگٹن خطے میں اپنی افواج کی ازسرنو تعیناتی اور عسکری تیاریوں کی سطح بلند کر رہا ہے تاکہ ممکنہ کشیدگی کے منظرناموں سے نمٹا جا سکے چاہے وہ محدود فوجی کارروائیاں ہوں یا تہران کے خلاف کسی قابض اسرائیلی اقدام کی حمایت۔
اس کے برعکس ایران رواں ماہ کے اختتام پر وسیع پیمانے پر بحری فوجی مشقوں کی تیاری کر رہا ہے جن میں روس اور چین بھی شریک ہوں گے۔ یہ مشقیں شمالی بحر ہند اور بحیرہ عمان میں منعقد ہوں گی اور ایک سیاسی اور عسکری پیغام سمجھی جا رہی ہیں جن کا مقصد مشرقی اتحادوں کو مضبوط بنانا اور امریکی دباؤ کے مقابلے میں اپنی دفاعی صلاحیت کا مظاہرہ کرنا ہے۔
یہ تمام فوجی مشقیں خطے میں طاقت کے اظہار کی دوڑ کا حصہ ہیں جہاں واشنگٹن کی قیادت میں ایک محور اور تہران ماسکو اور بیجنگ کے مفادات کے اشتراک سے بننے والا دوسرا محور آمنے سامنے ہے۔
یہ باہمی عسکری کشیدگی ایسے وقت میں عروج پر ہے جب پورا خطہ غیر معمولی تناؤ سے گزر رہا ہے۔ اس صورتحال کی ایک بڑی وجہ وہ سیاسی حقیقت ہے جسے غزہ اثر کہا جا رہا ہے جو دو سال تک جاری رہنے والی نسل کش جنگ کے بعد سامنے آئی۔ بحیرہ احمر میں جھڑپوں کے پھیلاؤ اور بین الاقوامی بحری آمدورفت کو نشانہ بنائے جانے نے حالات کو ایک وسیع علاقائی تصادم کی طرف دھکیلنے کے خطرات میں اضافہ کر دیا ہے۔
