روزنامہ قدس ـ آنلائن خبر رساں ادارہ
اقوام متحدہ کی امن فوج یونيفل نے تصدیق کی ہے کہ گذشتہ روز جنوبی لبنان کے علاقے سرده کے قریب اس کے اہلکاروں کی پٹرولنگ پارٹی پر قابض اسرائیلی فوج نے فائرنگ کی۔
یونيفل نے اپنے بیان میں بتایا کہ امن دستوں کے جوان جب گرین لائن کے ساتھ اپنے معمول کے گشت پر تھے تو قابض اسرائیل کے ایک میرکافا ٹینک سے ان پر براہ راست گولیاں چلائی گئیں۔
بیان کے مطابق قابض اسرائیلی فوج نے ایک ہی بار میں دس فائر کے برسٹ امن دستے پر کے اوپر فائر کیے جس کے بعد مزید چار مرتبہ دس دس برسٹ گشت کے قریب فائر کیے گئے۔
یونيفل نے واضح کیا کہ قابض اسرائیل کی جانب سے امن فوج پر یا اس کے آس پاس کسی بھی قسم کا حملہ اقوام متحدہ کی قرارداد 1701 کی سنگین خلاف ورزی ہے۔
واضح رہے کہ قرارداد 1701 کو 11 اگست سنہ 2006ء کو اقوام متحدہ کی سلامتی کونسل نے اس وقت منظور کیا تھا جب قابض اسرائیل اور حزب اللہ کے درمیان 34 روزہ جنگ جاری تھی۔ اس قرارداد کا بنیادی مقصد جنگ بندی قائم کرنا اور جنوبی لبنان میں امن و سکیورٹی کو یقینی بنانا تھا۔
اس قرارداد میں مکمل فوجی کارروائیوں کے خاتمے کا مطالبہ کیا گیا۔ حزب اللہ سے کہا گیا کہ وہ قابض اسرائیل پر حملے بند کرے اور اس کے بدلے قابض اسرائیل جنوبی لبنان سے اپنی فوج واپس بلائے۔ قرارداد میں یہ بھی شامل تھا کہ لبنان کی سرکاری فوج کو جنوبی علاقوں میں تعینات کیا جائے اور یونيفل کے ساتھ مل کر گرین لائن اور دریائے لیتانی کے درمیان ایک غیر فوجی زون قائم کیا جائے۔
