(روز نامہ قدس ۔آنلائن خبر رساں ادارہ )مقبوضہ فلسطین کے دریائے اردن کے مغربی کنارے کے شہر جنین میں قائم پناہ گزین کیمپ پر آج دوسرے دن بھی صیہونی جارحیت کےنتیجے میں شہید ہونے والے فلسطینیوں کی تعداد 9 ہوگئی جبکہ 100 سے زائد زخمی ہیں، غاصب صیہونی فورسز کے فلسطینیوں پر زمینی اور فضائی حملے آج بھی جاری ہیں۔
مقامی ذرائع کے مطابق مقبوضہ مغربی کنارے کے شہر جنین میں آج منگل کی صبح سویرے غاصب صیہونی فورسز کے تازہ دم دستوں کی کمک پہنچائی گئی جس کے ساتھ جھڑپیں دوبارہ شروع ہوئیں۔ صیہونی فوج کے ایلیٹ کور کے تقریباً 1000 فوجی اہلکارکیمپ کے قرب و جوار میں تعینات ہیں جس کو فضائی معاونت بھی حاصل ہے، ہیلی کاپٹرز اور ڈرون طیاروں کی نچلی پروازیں شہر پر جاری ہیں جو وقفہ وقفہ سے شہری آبادیوں کو نشانہ بنا رہے ہیں۔
فلسطینی وزارت صحت نے صیہونی فوج کے حملوں کے نتیجے میں نو افراد کی شہادت اور سے 100 سے زائد شہریوں کے زخمی ہونے کی تصدیق کی ہے۔ اسرائیل ڈیفنس فورسز (آئی ڈی ایف) نے کہا کہ وہ ’جنین کے علاقے میں دہشت گردوں کے بنیادی ڈھانچے‘ پر حملے کر رہے ہیں اور یہ ’دہشت گردوں کا گڑھ‘ ہے۔