بارسلونا – (روزنامہ قدس ـ آنلائن خبر رساں ادارہ) سپین کی حکومت نے قابض اسرائیل کے لیے اپنی سفیر ‘آنا سالومون’ کو تل ابیب میں ان کی ذمہ داریوں سے سبکدوش کر دیا ہے۔ سپین کے سرکاری جریدے میں شائع ہونے والی اس اطلاع کے مطابق اس فیصلے کا مطلب قابض اسرائیل میں سپین کی سفارتی نمائندگی کی سطح کو کم کر کے ‘ناظم الامور’ (چارج ڈی افیئرز) تک لانا ہے۔
سپین کی کابینہ کی جانب سے کیے گئے اس فیصلے کے تحت تل ابیب میں سفارتی مشن کی سربراہ کی خدمات کو سرکاری طور پر ختم کر دیا گیا ہے۔ اس کا مطلب یہ ہے کہ سپین کا سفارت خانہ اب ایک نئے سفیر کے تقرر تک نچلی سطح کی سفارتی نمائندگی کے ساتھ اپنا کام جاری رکھے گا۔
واضح رہے کہ سالومون کو گذشتہ سال ستمبر میں مشاورت کے لیے میڈرڈ طلب کیا گیا تھا اور میڈرڈ اور تل ابیب کے درمیان بڑھتی ہوئی سفارتی کشیدگی کے باعث وہ تب سے سپین ہی میں مقیم تھیں۔
سرکاری جریدے میں شائع ہونے والے فیصلے کے مطابق، سفارتی نمائندگی کی سطح میں یہ کمی اس جوابی کارروائی کے فریم ورک کے تحت کی گئی ہے جو قابض اسرائیل نے پہلے میڈرڈ میں اپنے سفارت خانے کے حوالے سے کی تھی۔
اس اقدام کا مطلب یہ ہے کہ اگر سپین دونوں ممالک کے درمیان سفارتی تعلقات کو دوبارہ مکمل سطح پر بحال کرنا چاہتا ہے، تو اسے مستقبل میں قابض اسرائیل کے لیے ایک نیا سفیر مقرر کرنا ہوگا اور اسرائیلی حکام سے باقاعدہ سفارتی منظوری حاصل کرنی ہوگی۔
غزہ کی پٹی پر جنگ کے بعد سے کشیدگی
یہ فیصلہ اکتوبر سنہ 2023ء میں غزہ کی پٹی پر قابض اسرائیل کی نسل کشی کی جنگ کے آغاز کے بعد سے دونوں ممالک کے درمیان بگڑتے ہوئے تعلقات کے تناظر میں سامنے آیا ہے، کیونکہ ہسپانوی حکومت نے غزہ کی پٹی میں اسرائیلی فوجی کارروائیوں پر اپنی تنقید میں شدت پیدا کر دی تھی۔
سپین کے وزیر اعظم پیڈرو سانشیز ان نمایاں یورپی رہنماؤں میں شامل ہیں جنہوں نے جنگ کے دوران قابض اسرائیل کی پالیسیوں پر سرِعام تنقید کی اور بارہا سیز فائر اور غزہ کی پٹی میں انسانی امداد کی فراہمی کا مطالبہ کیا۔
دونوں فریقین کے درمیان تناؤ اس وقت عروج پر پہنچ گیا جب سپین نے مئی سنہ 2024ء میں باقاعدہ طور پر ریاستِ فلسطین کو تسلیم کرنے کا اعلان کیا، جس نے قابض اسرائیل کی حکومت کو سیخ پا کر دیا۔
اس کے بعد دونوں جانب سے سفیروں کی طلبی اور سیاسی بیان بازی کا تبادلہ ہوا، جہاں قابض اسرائیل نے میڈرڈ پر اپنے خلاف معاندانہ موقف اختیار کرنے کا الزام لگایا، جبکہ ہسپانوی حکومت نے اس بات پر زور دیا کہ غزہ کی پٹی میں اسرائیلی پالیسیوں پر تنقید کرنا سامی دشمنی کے زمرے میں نہیں آتا۔
گذشتہ مہینوں کے دوران فوجی اور تجارتی تعاون سے متعلق اختلافات بھی سامنے آئے، کیونکہ سپین کے حکومتی اتحاد میں شامل بعض دھڑوں نے غزہ کی پٹی پر جاری سفاکیت کی وجہ سے قابض اسرائیل کے ساتھ لین دین پر پابندیاں عائد کرنے کا مطالبہ کیا تھا۔
میڈرڈ نے ان یورپی اور بین الاقوامی اقدامات کی بھی حمایت کی جن میں جنگ کے دوران ہونے والی انسانی حقوق کی خلاف ورزیوں کی تحقیقات کا مطالبہ کیا گیا تھا، جس سے قابض اسرائیل پر سیاسی دباؤ میں اضافہ ہوا۔
سپین اور قابض اسرائیل کے تعلقات کی تاریخ نسبتاً حساس رہی ہے، کیونکہ سپین نے سنہ 1986ء تک اسرائیل کو باقاعدہ تسلیم نہیں کیا تھا، جس کے بعد مختلف سیاسی اور اقتصادی شعبوں میں تعلقات استوار ہوئے۔ تاہم غزہ کی پٹی پر جاری نسل کشی کی جنگ نے اس کشیدگی کو دوبارہ سطح پر لا کھڑا کیا ہے، جہاں میڈرڈ نے اسرائیلی پالیسیوں پر سخت تنقیدی موقف اپنایا ہے، جس کے نتیجے میں دونوں ممالک کے درمیان سفارتی بحرانوں کا ایک سلسلہ شروع ہو گیا ہے۔
سفارتی نمائندگی کی سطح میں کمی کا مطلب تعلقات کا مکمل خاتمہ نہیں ہے، لیکن یہ غزہ کی پٹی پر نسل کشی کی جنگ کے آغاز کے بعد سے میڈرڈ اور تل ابیب کے درمیان پیدا ہونے والی بے مثال سیاسی کشیدگی کی عکاسی کرتا ہے۔
