(روزنامہ قدس ۔آنلائن خبر رساں ادارہ ) صیہونی فوج نے گذشتہ روز شہید فلسطینی کے جسد خاکی کو لواحقین کے حوالے کرنے کیلئے کئےجانے والے احتجاج پر بھی براہ راست فائرنگ کی تھی۔
تفصیلات کےمطابق قابض صیہونی فوج نے مقبوضہ مغربی کنارے کے شمالی شہر نابلس میں بیتا قصبے میں نہتے فلسطینیوں پر براہ راست فائرنگ اور آنسوگیس کی شیلنگ کی جس کے نتیجے میں کم سے کم 37 فلسطینی زخمی ہوگئے۔
اسرائیلی فوجیوں نے فلسطینی شہریوں پردھاتی گولیوں، آنسوگیس کی شیلنگ اور براہ راست آتشیں ہتھیاروں سے فائرنگ کی جس کے نتیجے میں تین درجن سے زاید فلسطینی زخمی ہوگئے۔ہلال احمر کے ایمرجنسی پروگرام کے ڈائریکٹر احمد جبریل نے بتایا ک اسرائیلی فوج کی فائرنگ سے زخمی ہونے والے متعدد فلسطینیوں کو اسپتالوں میں لے جایا گیا ہے۔
ایک فلسطینی کے بازو پر گولی لگی ہے جسے نابلس میں رفیدیا سرکاری اسپتال منتقل کیا گیا۔ نو فلسطینی دھاتی گولیوں کی فائرنگ سے زخمی ہوئے ہیں۔ ہلال احمر کے عہدیدار کا کہنا تھا کہ اسرائیلی فوج کی آنسوگیس کی شیلنگ سے 27 فلسطینی زخمی ہوئے جب کہ درجنوں فلسطینی دم گھٹنے سے متاثر ہوئے ہیں۔