(روزنامہ قدس ۔آن لائن خبر رساں ادارہ) فلسطینی تنظیم پاپولر فرنٹ نے انسانی حقوق کی عالمی تنظیموں سے مطالبہ کیا ہے کہ وہ سامی العمور کی حراست کے دوران شہادت اور ان کے ساتھی پر بہیمانہ تشدد کا نوٹس لیں۔
ذرائع کے مطابق گذشتہ روز مقبوضہ فلسطینی میں صہیونی قید کے دوران فلسطینی قیدی سامی العمور کی دوران حراست صہیونی جیل انتظامیہ کی مجرمانہ غفلت کے باعث شہادت ہو گئی ۔
اسرائیل کی صہیونی قید میں شہادت سے قبل اسیر کے ساتھی جمیل عنکوش نے قیدی یونٹ کی انتظامیہ سے بارہا سامی العمور کی دل کی تکلیف کے باعث بگڑتی حالت کی نشاندہی کی تھی تاہم جیل انتظامیہ کی جانب سے طبی امداد کو نظر انداز کر نے پر یونٹ میں احتجاج کیا اور اپنے یونٹ میں واپسی پر عنکوش کے خلاف شدید کریک ڈاؤن کیا ،صہیونی فوج نے غیر انسانی سلوک کرتے ہوئے اسے بدترین تشدد کا نشانہ بنایااورقیدی کے مسلسل احتجاج کے باوجود ان کے ساتھی سامی العمور کو موقع پر ہسپتال منتقل نہ کیا گیا جس کے باعث اسیر جان کی بازی ہار گیا۔
فلسطینی تنظیم پاپولر فرنٹ تنظیم جس پر صہیونی حکام نے دہشت گردی کا الزام لگا کر پابندی عائد کر دی ہے کی جانب سے قابض ریاست کوشہید سامی العمور کے قتل اور شدید زخمی انکے ساتھی عنکوش کی زندگی کا مکمل ذمہ دار ٹھہرایاہے، اور انسانی حقوق کی عالمی تنظیموں سے مطالبہ کیا ہے کہ سامی العمور کی حراست کے دوران شہادت اور ان کے ساتھی پر بہیمانہ تشدد کا نوٹس لیں۔