(روز نامہ قدس ۔آنلائن خبر رساں ادارہ) فلسطینی وزارت صحت نے ایک خطرناک اور تشویشناک انکشاف کرتے ہوئے کہا ہے کہ محصور غزہ میں 90 فیصد آبادی کو پینے کے پانی کی شدید قلت کا سامنا ہے، جب کہ دستیاب پانی کے نمونوں میں آلودگی کی شرح 25 فیصد سے تجاوز کر چکی ہے۔ یہ بحران براہ راست غیر قانونی صیہونی ریاست اسرائیل کی جانب سے جاری محاصرے اور بنیادی سہولیات کی مسلسل بندش کا نتیجہ ہے۔
بدھ کے روز جاری کی گئی رپورٹ میں وزارت صحت نے بتایا کہ آلودہ پانی کے استعمال کے باعث شہریوں میں پیٹ، جلد اور دیگر وبائی بیماریاں تیزی سے پھیل رہی ہیں، جو ایک بڑے انسانی المیے کو جنم دے رہی ہیں۔ رپورٹ کے مطابق گرمیوں کی شدت میں اضافے کے ساتھ ساتھ صاف پانی کی طلب میں بھی غیر معمولی اضافہ ہوا ہے، خاص طور پر ان علاقوں میں جہاں بمباری سے بے گھر ہونے والے فلسطینی عارضی کیمپوں میں مقیم ہیں۔ ان کیمپوں میں صاف پانی کی عدم دستیابی نے ان کی زندگی مزید مشکل بنا دی ہے۔
وزارت صحت کے مطابق، غزہ میں سیوریج کا نظام بھی مکمل طور پر تباہی کے دہانے پر ہے۔ گندے پانی کے نکاس کے لیے بنائی گئی جذب گاہیں زیرِ زمین پانی کے ذخائر کو آلودہ کر رہی ہیں، جس کے نتیجے میں آلودہ پانی پینے کے استعمال میں آ رہا ہے، جو ایک خطرناک اور ناقابل قبول صورتحال ہے۔
رپورٹ میں اس امر پر شدید تشویش کا اظہار کیا گیا کہ غزہ کے 90 فیصد ڈی سیلینیشن پلانٹس، یعنی نمک سے پانی صاف کرنے والے پلانٹس، مکمل طور پر بند ہو چکے ہیں۔ اسی طرح، 80 فیصد سیوریج پمپنگ اسٹیشنز بھی ناکارہ ہو چکے ہیں، جس کی وجہ سے پینے کے پانی کے ذخائر اور سمندر دونوں شدید آلودہ ہو چکے ہیں۔ ماہرین کے مطابق یہ ماحولیاتی تباہی کا ایک اور واضح ثبوت ہے۔
وزارت نے واضح کیا کہ یہ بحران صرف پانی کی قلت کا نہیں بلکہ ایک منظم انسانی تباہی کا نتیجہ ہے، جو غیر قانونی صیہونی ریاست اسرائیل کی جانب سے غزہ کے محاصرے، بمباری، اور امداد کی بندش کے باعث پیدا ہوا ہے۔
پانی، خوراک اور صحت کی سہولیات کی عدم دستیابی کے باعث فلسطینی عوام ایک ساتھ کئی محاذوں پر بقا کی جنگ لڑ رہے ہیں۔ ایک طرف پیاس، دوسری طرف بھوک، تیسری جانب بیماریوں کی یلغار ہے — اور ان سب کے پیچھے غیر قانونی صیہونی ریاست کی وہ حکمت عملی ہے جس کا مقصد فلسطینیوں کو اجتماعی سزا دینا اور ان کے بنیادی انسانی حقوق کو پامال کرنا ہے۔
رپورٹ کے اختتام پر وزارت صحت نے بین الاقوامی برادری، انسانی حقوق کی تنظیموں اور امدادی اداروں سے فوری مداخلت کی اپیل کی ہے تاکہ غزہ کے عوام کو اس بحران سے نکالا جا سکے اور غیر قانونی صیہونی ریاست کی ظالمانہ پالیسیوں کا سدِباب کیا جا سکے۔