(روزنامہ قدس ۔آنلائن خبر رساں ادارہ) صدر محمود عباس نے اقوام متحدہ میں صیہونیوں کو خبردار کیا تھا کہ سبھی آپشن فلسطینیوں کی میز پر ہیں اور صیہونی حکومت ہمیشہ فلسطینیوں کے سینے پر سوار رہ کر ان کا گلا نہیں گھونٹ سکتی۔
تفصیلات کے مطابق فلسطین لبریشن آرگنائزیشن کی ایگزیکیٹو کمیٹی کے رکن واصل ابو یوسف نےاپنے بیان میں کہاہے کہ حالات میں تیزی سے تبدیلی کے باعث ضروری ہے کہ فلسطینیوں کے خلاف غاصب صہیونیوں کے بڑھتے جرائم کو لگام دی جائے۔
ابو یوسف نے کہا کہ صیہونیوں کی پیدا کردہ کشیدگی اور انکے ذریعے ہونے والا فلسطینیوں کا خون خرابہ اس بات کا متقاضی ہے کہ مؤثر انداز میں اس پر نوٹس لیتے ہوئے فلسطینیوں کی جانوں کا تحفظ کیا جائے اور صیہونی حکومت کو مزید جرائم کے ارتکاب سے روکنے کے لئے اُس پر فوری دباؤ بنایا جائے۔
فلسطین لبریشن آرگنائزیشن کی ایگزیکٹو کمیٹی کے رکن نےواضح کیا کہ صیہونیوں کی انتہا پسند حکمراں جماعت کی بنیادی پالیسی، اشتعال انگیزی پر استوار ہےجبکہ صیہونیوں نے اقوام متحدہ کی جنرل اسمبلی میں فلسطینی اتھارٹی کے سربراہ محمود عباس کی تقریر کے بعد کشیدگی کو ہوا دی ہے۔
واضح رہے کہ صدر محمود عباس نے اقوام متحدہ میں صیہونیوں کو خبردار کیا تھا کہ سبھی آپشن فلسطینیوں کی میز پر ہیں اور صیہونی حکومت ہمیشہ فلسطینیوں کے سینے پر سوار رہ کر ان کا گلا نہیں گھونٹ سکتی۔