(روز نامہ قدس ۔آنلائن خبر رساں ادارہ ) اریحا سے تعلق رکھنے والےفلسطینی عمادالسوار صہیونی جیل میںاپنی غیر قانونی انتظامی حراست کے خلاف مسلسل احتجاجی بھوک ہڑتال جاری رکھے ہوئے ہیں جس کے باعث ان کی زندگی کو شدید خطرات کا سامنا ہے۔
ذرائع کے مطابق مقبوضہ فلسطینی علاقے اریحا سے تعلق رکھنے والے37 سالہ فلسطینی قیدی عمادالسوار صہیونی جیل عسقلان میں اپنی غیر قانونی حراست کےخلاف رہائی کی درخواست مسترد کیے جانے کے بعد مسلسل48 روز سے بھوک ہڑتال جاری رکھے ہوئے ہیں جس کے باعث ان کی حالت نہایت خراب ہو تی جارہی ہے تاہم صہیونی جیل حکام کی جانب سے ابھی تک ان کی رہائی کے حوالے سے کوئی مثبت اقدامات سامنے نہیں آیا ہے۔
واضح رہے کہ عماد السوار کے ساتھ صہیونی جیل انتظامیہ کی جانب سے مجرمانہ غفلت کا سلوک روا رکھا جارہا ہے جس کے باعث اسیر کمزوری کی وجہ سے پیٹ، سر اور معدے میں شدید پیچیدگیوں کا سامنا کررہا ہے اور انکا وزن مسلسل کم ہورہا ہے۔