(روز نامہ قدس ۔آنلائن خبر رساں ادارہ ) صیہونی آبادکاروں کے فلسطینی آبادی پر حملے اور فلسطینیوں کے جوابی حملے میں چار صیہونی آبادکاروں کے زخمی ہونے کے بعد اسرائیلی فوج اور سیکیورٹی فورسز نے رات بھر چھاپہ مار کارروائیاں کیں۔
مقبوضہ بیت المقدس کے علاقے باب العمود پر مسلح صیہونی آبادکاروں نے فلسطینیوں کے گھروں پر حملہ کیا اور املاک کو نقصان پہنچایا، اطلاع ملتے ہی فلسطینی نوجوانوں نے صیہونی بلوائیوں پر جوابی حملہ کیا جس میں کم سے کم چار صیہونی زخمی ہوئے، صیہونی آبادکاروں کے زخمی ہونے پر اسرائیلی فوج اور سیکیورٹی اداروں نے بڑے پیمانے پر کریک ڈاؤن کیا۔
مقامی ذرائع کے مطابق قابض فوج نے رات بھر چھاپہ مار کارروائیاں جاری رکھتے ہوئے درجنوں فلسطینیوں کو گرفتار کیا، گرفتار ہونے والوں میں ایک خاتون اور ایک 14 سالہ بچے کی بھی تصدیق کی گئی ہے۔