بیروت – (روزنامہ قدس ـ آنلائن خبر رساں ادارہ) لبنان کے سرکاری اور مقامی ذرائع ابلاغ کے مطابق بدھ کی علی الصبح لبنان کے مختلف علاقوں پر قابض اسرائیل کے فضائی حملوں کے نتیجے میں 16 افراد شہید اور 22 زخمی ہو گئے ہیں، جبکہ قابض اسرائیل اور حزب اللہ کے درمیان جھڑپوں کا سلسلہ بدستور جاری ہے۔
لبنانی رپورٹس میں بتایا گیا ہے کہ قابض اسرائیل کے جنگی طیاروں نے علی الصبح جنوبی لبنان کے ضلع صور میں واقع قصبوں حناویہ، الشہابیہ، قانا اور الحوش پر بمباری کی، اس کے علاوہ صوبہ جبل لبنان میں بیروت کے جنوبی مضافاتی علاقے (ضاحیہ) میں واقع لیلکی گاؤں اور مغربی بقاع کے قصبے زلایا کو بھی نشانہ بنایا گیا۔
یہ فضائی حملے لبنان میں گذشتہ منگل کے خونی دن کے بعد کیے گئے ہیں، جس میں گذشتہ پیر سے جاری عسکری کشیدگی کے دوران جنوبی لبنان، بقاع اور بیروت کے جنوبی مضافاتی علاقوں پر اسرائیلی حملوں کے نتیجے میں لبنانی فوج کا ایک اہلکار، ایک پیرامیڈک، ایک میئر اور بلدیاتی کونسل کا ایک رکن سمیت متعدد عام شہری شہید ہو گئے تھے۔
لبنانی حکومت کے ڈیزاسٹر رسک مینجمنٹ یونٹ کے مطابق اسرائیلی حملوں میں شہداء کی مجموعی تعداد 570 ہو گئی ہے جبکہ 1444 افراد زخمی ہوئے ہیں۔ اس کے علاوہ تقریباً 7 لاکھ 59 ہزار 300 افراد بے گھر ہو چکے ہیں، جن میں سے ایک لاکھ 22 ہزار 600 کے قریب لوگ امدادی مراکز میں مقیم ہیں اور بے گھر ہونے والے خاندانوں کی تعداد تقریباً 31 ہزار 500 تک پہنچ چکی ہے۔
دوسری جانب قابض اسرائیل کی فوج بیروت کے جنوبی مضافاتی علاقوں اور جنوبی لبنان کے دیہاتوں کو خالی کرنے کے انتباہات جاری کرنے کے ساتھ ساتھ فضائی حملے بھی جاری رکھے ہوئے ہے، جبکہ حزب اللہ کی جانب سے اسرائیلی فوجی مراکز اور اڈوں پر میزائلوں اور ڈرونز سے حملوں کا سلسلہ جاری ہے۔
حزب اللہ نے بدھ کی صبح اعلان کیا کہ اس نے اسرائیلی فوجی مراکز پر میزائلوں اور توپ خانے سے چھ حملے کیے ہیں، جن میں لبنانی حدود کے اندر اور شمالی اسرائیل میں موجود فوجیوں کے اجتماعات اور ٹھکانوں کو نشانہ بنایا گیا۔
اس طرح 2 مارچ سے اب تک حزب اللہ کی جانب سے اسرائیلی اہداف پر کیے جانے والے حملوں کی تعداد تقریباً 150 ہو گئی ہے، جبکہ میڈیا رپورٹس کے مطابق گذشتہ ہفتے ہفتہ کا دن سب سے زیادہ پُرتشدد رہا جس میں ایک ہی دن میں 33 حملے ریکارڈ کیے گئے۔
حزب اللہ نے منگل کے روز بھی 30 کارروائیوں کا اعلان کیا تھا جن میں اسرائیلی فوجی اڈوں اور مختلف علاقوں میں واقع بستیوں کو نشانہ بنایا گیا تھا۔ تنظیم نے اپنے پے در پے بیانات میں واضح کیا ہے کہ یہ کارروائیاں ان اسرائیلی فضائی حملوں کا جواب ہیں جو بیروت کے جنوبی مضافاتی علاقوں سمیت درجنوں لبنانی شہروں اور دیہاتوں پر کیے جا رہے ہیں۔
حزب اللہ کے مطابق اس نے سرحدی قصبے عیترون کے علاقے الخانوق کی طرف پیش قدمی کرنے والی ایک اسرائیلی فورس کو میزائلوں سے نشانہ بنایا، جبکہ قصبہ مرکبا کے مقابل المرج سائٹ پر اسرائیلی فوج کی گاڑیوں اور فوجیوں کے اجتماع پر بھی حملہ کیا۔ مزید برآں، سرحدی مقامات بشمول نو قائم شدہ حمامص سائٹ، ہضبۃ العجل اور فاطمہ گیٹ کے علاوہ شمالی اسرائیل میں المطلہ اور کفر غلعادی کی بستیوں میں فوجی مراکز اور اہلکاروں کے اجتماعات کو نشانہ بنایا گیا۔
مزاحمتی تنظیم نے یہ بھی بتایا کہ اس نے قصبہ حولا کے مقابل العباد سائٹ پر معیاری میزائلوں سے حملہ کیا، اس کے علاوہ عکا کے جنوب مشرق میں یودیفات نامی عسکری صنعت کی کمپنی اور حیفہ کے جنوب میں قابض اسرائیل کی فوج کے مشمار الکرمل میزائل ڈیفنس سائٹ کو بھی نشانہ بنایا۔ حزب اللہ نے سعسع بستی میں توپ خانے کے مرکز، عدیسہ اور خیام کے قریب اسرائیلی فوجیوں کے ٹھکانوں پر بمباری سمیت بحیرہ طبریہ کے مغرب میں واقع شمشون بیس پر خودکش ڈرونز کے ذریعے حملے کا بھی اعلان کیا ہے۔
یہ شدید کشیدگی لبنان اور فلسطین کی سرحدوں پر روزانہ کی بنیاد پر جاری جھڑپوں کے سائے میں ہو رہی ہے، جس سے خطے میں جنگ کے دائرہ کار میں وسعت کے خدشات بڑھتے جا رہے ہیں اور غاصب صہیونی ریاست کی جانب سے فلسطینیوں اور لبنانیوں کی نسل کشی کا سلسلہ تاحال تھم نہیں سکا ہے۔
