(روز نامہ قدس ۔آنلائن خبر رساں ادارہ) فلسطینی عوام پر جاری مظالم اور نہتے شہریوں کے قتل عام کے جواب میں اسلامی جہاد کی عسکری شاخ سرایا القدس نے منگل کی شام عسقلان، اسدود اور غلافِ غزہ کی غیر قانونی صیہونی ریاست اسرائیل کی بستیوں کو راکٹ حملوں کا نشانہ بنانے کی ذمہ داری قبول کر لی ہے۔
سرایا القدس کے مطابق، ان کے راکٹ یونٹ نے اشدود، عسقلان، سدیروت اور شمالی غلافِ غزہ میں قائم کئی صیہونی بستیوں پر درجنوں راکٹ داغے۔ بیان میں کہا گیا کہ یہ حملے غزہ کی پٹی میں جاری صیہونی نسل کشی کے ردعمل میں کیے گئے، جہاں غیر قانونی صیہونی ریاست کی افواج روزانہ کی بنیاد پر بے گناہ فلسطینیوں کو نشانہ بنا رہی ہیں۔
تنظیم نے واضح کیا کہ "یہ راکٹ حملے ہمارے نہتے شہریوں پر کیے گئے مظالم اور قتل عام کا فطری جواب ہیں۔”
دوسری طرف غیر قانونی صیہونی ریاست کی فوج نے تصدیق کی ہے کہ غزہ سے داغے گئے تین راکٹوں میں سے دو کو ان کے دفاعی نظام نے فضا میں تباہ کیا، جبکہ تیسرا راکٹ ایک غیر آباد علاقے میں گرا۔
صیہونی داخلی سلامتی کے ادارے نے بھی تصدیق کی کہ عسقلان، نیر عام، ایفیہم اور سدیروت سمیت غلافِ غزہ کے شمالی علاقوں میں خطرے کے سائرن بجائے گئے، جس کے بعد مقامی باشندے پناہ گاہوں کی طرف دوڑتے دیکھے گئے۔
غزہ پر غیر قانونی صیہونی ریاست اسرائیل کی جانب سے مسلسل حملوں، بمباری اور محاصرے کے تناظر میں فلسطینی مزاحمتی گروہوں کی جانب سے جوابی کارروائیاں بڑھتی جا رہی ہیں، جو نہ صرف مزاحمت کا پیغام دیتی ہیں بلکہ فلسطینی عوام کے حقِ دفاع کو بھی دنیا کے سامنے اجاگر کرتی ہیں۔