سری نگر (روزنامہ قدس ـ آنلائن خبر رساں ادارہ) مقبوضہ کشمیر میں بھارتی انتہا پسندی ایک بار پھر بے نقاب ہو گئی ہے، جہاں ایک مسلمان کرکٹر کو محض فلسطینی عوام کے حق میں اظہارِ یکجہتی کرنے پر پابندی کا سامنا کرنا پڑا۔ فرقان بھٹ نامی کھلاڑی نے مقامی کرکٹ میچ میں ہیلمٹ پر فلسطینی جھنڈے کا اسٹیکر لگا کر میدان میں حصہ لیا تھا۔
بھارتی میڈیا کے مطابق یہ واقعہ جموں و کشمیر چیمپئنز لیگ کے دوران کے سی اسپورٹس کلب میں پیش آیا۔ فرقان بھٹ کے اس اقدام نے تنازع کھڑا کر دیا اور مقامی حکام کی توجہ کا مرکز بن گیا۔
معاملہ سامنے آنے پر مقبوضہ کشمیر پولیس نے تحقیقات شروع کر دی ہیں۔ ٹورنامنٹ کے منتظمین نے پولیس کو بتایا کہ انہیں ہیلمٹ پر اسٹیکر کے بارے میں علم نہیں تھا۔ تاہم بھارتی انتہا پسندی کی عکاسی کرتے ہوئے فرقان بھٹ کو آئندہ لیگ میں کھیلنے سے روک دیا گیا ہے۔
ذرائع کے مطابق پولیس نے بھٹ کو پوچھ گچھ کے لیے طلب کیا ہے تاکہ یہ جانا جا سکے کہ میچ کے دوران فلسطینی جھنڈا لگانے کا مقصد کیا تھا۔
واقعہ پر بھارتی سیاسی حلقوں میں بھی ردِعمل آیا۔ بی جے پی ایم پی پروین کھنڈیلوال نے کہا کہ بھارت میں رہنے والے ہر شخص کو بھارتی پرچم لہرانا ضروری ہے، اور جو بھی فلسطینی پرچم لہرائے گا اسے بھارت سے محبت نہیں سمجھا جائے گا۔
یہ واقعہ بھارت کے دوہرے معیار کو واضح کرتا ہے: جہاں اظہارِ رائے کی آزادی کے دعوے کیے جاتے ہیں، وہیں فلسطین کے حق میں ایک علامتی اظہار بھی برداشت نہیں کیا جاتا۔
