اسلام آباد – روزنامہ قدس ـ آنلائن خبر رساں ادارہ
بین الاقوامی یومِ یکجہتیِ فلسطین کے موقع پر صدر مملکت آصف علی زرداری نے فلسطینی عوام کے ساتھ اپنی دلی یکجہتی اور حمایت کا بھرپور اظہار کیا۔
صدر مملکت نے کہا کہ آج ہم بہادر فلسطینی عوام کو دل کی گہرائیوں سے سلام پیش کرتے ہیں، جنہوں نے بے مثال ہمت، ثابت قدمی اور غیر متزلزل حوصلے کے ساتھ تاریخ میں ایک نیا باب رقم کیا ہے۔ انہوں نے کہا کہ پاکستان فلسطین کے ساتھ اپنے دیرینہ اور قریبی برادرانہ تعلقات کو ہمیشہ اہمیت دیتا رہا ہے۔
آصف علی زرداری نے واضح کیا کہ پاکستان ہمیشہ سے فلسطینی عوام کے ساتھ کھڑا رہا ہے اور فلسطینیوں کے لیے پاکستانی حمایت انسانیت، انصاف اور برابری کے اصولوں پر قائم ہے۔ انہوں نے کہا کہ مشکل حالات میں بھی پاکستانی قوم نے ہمیشہ اپنے فلسطینی بھائیوں اور بہنوں کا ساتھ دیا اور فلسطین کی حمایت پاکستان کی پہچان کا حصہ رہی ہے۔
صدر مملکت نے مزید کہا کہ پاکستان نے غزہ میں جاری اسرائیلی مظالم کی شدید مذمت کی ہے اور ہر عالمی فورم پر فلسطینی عوام کے حقوق کے لیے آواز بلند کی ہے۔ انہوں نے اقوامِ متحدہ، او آئی سی، آئی سی جے اور دیگر عالمی فورمز پر فلسطینیوں کے بنیادی حقوق کے تحفظ کی ضرورت پر زور دیا۔ انہوں نے کہا کہ پاکستان غزہ امن معاہدے میں بھی مثبت اور تعمیری کردار ادا کرتا رہا ہے تاکہ اسرائیلی ظلم سے فلسطینی عوام پر ڈھائے گئے دکھوں کا خاتمہ ممکن ہو سکے۔
صدر آصف علی زرداری نے یقین دلایا کہ پاکستان فلسطینی عوام کی سیاسی، سفارتی، انسانی اور اخلاقی حمایت جاری رکھے گا اور فلسطین ایک آزاد، خودمختار اور مضبوط ریاست کے طور پر قائم ہو، جس کا دارالحکومت القدس الشریف ہو۔
آخر میں انہوں نے دعا کی کہ فلسطینی عوام کی جدوجہد دنیا کے سوئے ہوئے ضمیر کو جگائے اور دنیا میں انصاف اور امن کی فتح ہو۔ صدر مملکت نے اپنی دلی خواہش بھی ظاہر کی کہ ایک دن انہیں مسجدِ اقصیٰ میں اپنے فلسطینی بھائیوں کے ساتھ نماز ادا کرنے کی سعادت حاصل ہو، انشاء اللہ۔
