پاکستان کشمیریوں کے ساتھ ہر قدم پر کھڑارہے گا، وزیر اعظم

(روز نامہ قدس ۔آنلائن خبر رساں ادارہ ) وزیر اعظم نے کہا کہ غیر قانونی بھارتی قبضے کے خلاف کشمیری مرد اور خواتین جدوجہد جاری رکھے ہوئے ہیں اور پاکستان کشمیریوں کے ساتھ ان کی منصفانہ جدوجہد میں ساتھ کھڑا ہے۔

تفصیلات کے مطابق گذشتہ روز وزیراعظم عمران خان کی جانب سے سماجی رابطے کی ویب سائٹ ٹوئٹر پر یہ پیغام جاری کیا گیا ہے کہ ہم یوم شہداءپر کشمیریوں کے ساتھ کھڑے ہیں اور 13 جولائی 1931 کے 22 شہداءکو خراج عقیدت پیش کرتے ہیں جب ڈوگرا مہاراجہ کے فوجیوں نے پرامن کشمیری مظاہرین پر فائرنگ کی تھی۔

انہوں نےاپنے پیغام میں کہاہے کہ مقبوضہ کشمیر میں بھارتی قبضے، ظلم اور انسانی حقوق کی خلاف ورزیوں کی ایک تاریخ ہےجو کشمیریوں پر ظلم و بربریت اور غیرقانونی بھارتی قبضے کے خلاف نئی جدوجہد  کوسامنے لائی ہے۔

وزیر اعظم نے کہا کہ غیر قانونی بھارتی قبضے کے خلاف کشمیری مرد اور خواتین جدوجہد جاری رکھے ہوئے ہیں اور  پاکستان کشمیریوں کے ساتھ ان کی منصفانہ جدوجہد میں کھڑا ہے جبکہ یہ جدوجہد اس وقت تک جاری رہے گی جب تک اقوام متحدہ کی قراردادوں کے مطابق مسئلہ کشمیر حل نہیں ہوجاتا۔