بیت المقدس و الخلیل میں آبادکاروں کے حملوں کی تازہ لہر، فلسطینی زخمی

مقبوضہ بیت المقدس – (روزنامہ قدس ـ آنلائن خبر رساں ادارہ) مقبوضہ بیت المقدس اور مغربی کنارے کے شہر الخلیل میں مختلف اسرائیلی حملوں اور یہودی آباد کاروں کی دہشت گردی کے نتیجے میں دو فلسطینی زخمی ہو گئے۔

فلسطینی ہلالِ احمر نے اطلاع دی ہے کہ قابض اسرائیلی فوج نے مقبوضہ بیت المقدس کے شمال میں واقع جبع فوجی چوکی کے قریب ایک نوجوان کو وحشیانہ تشدد کا نشانہ بنایا، جس کے باعث اسے علاج کے لیے ہسپتال منتقل کرنا پڑا۔

ایک اور واقعے میں الخلیل کے مشرق میں واقع مسافر بنی نعیم کے مقام پر آباد کاروں نے ایک شہری پر حملہ کر کے اسے تشدد کا نشانہ بنایا، جس سے اس کے سر پر چوٹ آئی اور ہلالِ احمر کے عملے نے اسے فوری طور پر ہسپتال منتقل کیا۔

فلسطینی دیوارِ فاصل اور آباد کاری مزاحمتی کمیشن کے مطابق قابض افواج اور آباد کاروں نے منظم دہشت گردی کی پالیسی کے تسلسل میں گذشتہ ماہ جنوری کے دوران مغربی کنارے میں 1872 حملے ریکارڈ کیے ہیں۔

کمیشن نے وضاحت کی ہے کہ ان حملوں میں 125 بدو خاندانوں کی جبری بے دخلی، 9 نئی آباد کار بستیوں کے قیام کی کوششیں، 744 دونم اراضی پر قبضہ اور 126 تنصیبات کا انہدام شامل ہے۔ اس کے علاوہ جسمانی تشدد، درختوں کو اکھاڑنا، کھیتوں کو آگ لگانا اور کسانوں کو ان کی زمینوں تک پہنچنے سے روکنے جیسے سفاکانہ اقدامات بھی اس مہم کا حصہ ہیں۔