الجلیل پر حزب اللہ کے میزائل حملے، اسرائیلی خاتون ہلاک، متعدد زخمی

الجلیل – (روزنامہ قدس ـ آنلائن خبر رساں ادارہ) مقبوضہ فلسطین کے شمالی علاقے الجلیل پر لبنان سے داغے گئے میزائلوں کے نتیجے میں منگل کی شام ایک اسرائیلی خاتون ہلاک اور متعدد دیگر زخمی ہو گئے۔

عبرانی ذرائع نے اطلاع دی ہے کہ حزب اللہ نے الجلیل کے علاقے پر میزائلوں کی بوچھاڑ کی جس کے نتیجے میں ایک ہلاکت اور کئی افراد کے زخمی ہونے کے علاوہ بڑے پیمانے پر مالی نقصان بھی ہوا ہے۔

یہ کارروائی جنوبی لبنان کے متعدد شہروں اور قصبوں، جن میں الخیام اور الناقورہ سرِ فہرست ہیں، میں بڑھتی ہوئی جھڑپوں کے درمیان سامنے آئی ہے۔ دوسری جانب قابض اسرائیل کی جانب سے سرحدی پٹی کے دیہات کو تیزی سے مسمار کرنے کی دھمکیاں دی جا رہی ہیں تاکہ زمینی دراندازی کے راستے محفوظ بنائے جا سکیں، جبکہ علاقے کو مکینوں سے خالی کرانے کے لیے نام نہاد "رفح ماڈل” کو لاگو کرنے کا عندیہ بھی دیا جا رہا ہے۔

رواں ماہ کی دو تاریخ کو حزب اللہ نے قابض اسرائیل کے فوجی ٹھکانوں کو نشانہ بنانے کا اعلان کیا تھا، جسے اس نے سنہ 2024ء میں 27 نومبر کو ہونے والی جنگ بندی (سیز فائر) کے بعد سے لبنان پر جاری مسلسل جارحیت کا جواب قرار دیا تھا۔

تب سے اب تک قابض اسرائیل نے اپنے فضائی حملوں کا دائرہ کار وسیع کرتے ہوئے بیروت کے جنوبی ضاحیہ اور جنوبی و مشرقی لبنان کے علاقوں کو نشانہ بنایا ہے، جبکہ جنوب میں محدود زمینی دراندازی کی کوششیں بھی شروع کی ہیں۔ دوسری طرف حزب اللہ نے اپنے جنگجوؤں کی جانب سے ان کوششوں کو ناکام بنانے کا اعلان کیا ہے، جو آنے والے وقت میں محاذ آرائی کے دائرے میں مزید وسعت کا پیش خیمہ ہے۔