(روز نامہ قدس ۔آنلائن خبر رساں ادارہ ) فلسطینی علاقے کفر قاسم تک پھیلے اس منصوبے میں نہ صرف مغربی کنارے کے رہائشی علاقوں کے قریب بلکہ اس شہر کے قریب بھی ماحولیاتی آلودگی پھیلانے والی فیکٹریاں شامل ہوں گی.
عبرانی اخبار ’یدیعوت احرونوت‘کے مطابق غیر قانونی صیہونی ریاست اسرائیل کی ناردرن ویسٹ بینک سیٹلمنٹ کونسل نے مقبوضہ شمالی مغربی کنارے میں ایک بڑا صنعتی زون قائم کرنے کا منصوبہ تیار کیا ہے، جس سے نمایاں ماحولیاتی آلودگی پھیلے گی اور شمالی مغربی کنارے میں خطرے سے دوچار جانوروں کی پوری آبادی ختم ہو جائے گی۔ 2,700 دونم رقبے پر قائم ہونے والاصنعتی زون شمالی مغربی کنارے سے فلسطینی علاقے کفر قاسم تک پھیلا ہوگا۔
کفر قاسم کے میئر عادل بدیر نے اس منصوبے پر اعتراض کرتے ہوئے کہا ہے کہ فیکٹریوں میں خطرناک مواد کا استعمال یا آلودگی پھیلانے والے مواد کا اخراج خطرناک اور تباہ کن ثابت ہوسکتا ہے۔ اس کے باوجود یہ منصوبہ کسی متبادل پر غور کیے بغیر اور اسرائیلی قانون کو مکمل طور پر نظرانداز کرتے ہوئے پیش کیا گیا۔
اس صنعتی منصوبے سے ہرن کی ایک بڑی تعداد اور ممالیہ، پرندے اور دیگر جانوروں کی ایک بڑی اقسام کے ختم ہونے کا اندیشہ ہے۔ اسرائیلی امور میں ماہر صحافی انس ابو عرقوب نے تصدیق کی کہ قابض حکومتیں آباد کاری کے صنعتی زونز کی تعمیر کے خواہاں ہیں جن میں مغربی کنارے میں آلودگی پھیلانے والی فیکٹریاں شامل ہیں تاکہ بڑی اسرائیلی رہائشی کمیونٹیز سے آلودگی کو دور کیا جا سکے۔