(روز نامہ قدس ۔آنلائن خبر رساں ادارہ ) نو منتخب اسرائیلی وزیر اعظم نفتالی بینیٹ نے اقتدار سنبھالتے ہی کہا ہے کہ نئی حکومت فلسطینی علاقوں میں یہودی آباد کاری کا عمل جاری رکھے گی۔
تفصیلات کے مطابق فلسطینی وزیر اعظم محمد اشتیہ کی جانب سے اسرائیلی نئی حکومت کےوزیر اعظم نفتالی بینیٹ کے بیان کی شدید مذمت کر تے ہوئے کہا ہے ہم نئے اسرائیلی وزیر اعظم کے یہودی بستیوں کی تعمیر جاری رکھنے کے اعلان کے خلاف ہیں اورہماری عوام ظلم کےخلاف ان کوششوں کا مقابلہ کرتے رہیں گے۔
انہوں نے کہا کہ نئی اسرائیلی حکومت بھی سابقہ حکومت سے کم بری نہیں، اس سے بھی بہتری کی کوئی نہیں رکھی جاسکتی۔
محمد اشتیہ نے بیت المقدس میں یہودی انتہا پسندوں کو سڑکوں پر پرچم بردار جلوس نکالنے کی اجازت دینےپربھی اسرائیلی حکومت کے اس اقدام کی مذمت کرتے ہوئے اسے خطرناک قرار دیا ہے، ان کا کہنا تھا کہ اسرائیلی انتہا پسندوں کو جلوس نکالنے کی اجازت دینے کے تمام نتائج اور مضمرات کی ذمہ داری اسرائیلی حکومت پرعائد ہوگی۔
غزہ کی پٹی کی تعمیر نو کے معاملے پر انہوں نے وضاحت کرتے ہوئے کہا کہ غزہ کی پٹی کو ناکہ بندی اور محاصرے کے خاتمے کی ضرورت ہےاور غزہ کی پٹی کی پیداواری صلاحیت میں اضافہ کرنے اور ابتر معاشی صورت حال کو بہتر بنانے کی ضرورت پر زور دیا۔
خیال رہے کہ نو منتخب اسرائیلی وزیر اعظم نفتالی بینیٹ نے اقتدار سنبھالتے ہی کہا ہے کہ نئی حکومت فلسطینی علاقوں میں یہودی آبادکاری کا عمل جاری رکھے گی۔