نابلس میں فلسطینی زمین پر یہودی آبادکاروں کا قبضہ

(روزنامہ قدس ـ آنلائن خبر رساں ادارہ) یہودی آبادکاروں نے آج منگل کے روز غرب اردن کے شمالی شہر نابلس شہر کے مشرق میں فلسطینی زرعی اراضی پر اپنے حملوں میں خطرناک اضافہ کرتے ہوئے بیت فوريك کے میدان میں متعدد زرعی راستے بند کر دیے۔ یہ اقدام فلسطینی کسانوں پر دباؤ بڑھانے اور ایک نیا جابرانہ اقدام مسلط کرنے کی دانستہ کوشش ہے تاکہ زمینوں پر قبضے اور ضبطی کے صہیونی منصوبوں کو آگے بڑھایا جا سکے۔

مقامی ذرائع نے بتایا کہ ایک قریبی غیرقانونی یہودی چوکی سے نکلنے والے آبادکاروں نے مٹی کے ڈھیر اور پتھر استعمال کرتے ہوئے کئی کچے اور زرعی راستے بند کر دیے جس کے باعث فلسطینی کسانوں کی اپنی زمینوں تک رسائی مسدود ہو گئی اور وہ زرعی سرگرمیاں جاری رکھنے سے محروم ہو گئے۔

یہ جارحانہ اقدام اس مسلسل سلسلہ وار خلاف ورزیوں کا حصہ ہے جو اس علاقے میں جاری ہیں جہاں یہودی آبادکار جان بوجھ کر مقامی آبادی کا گھیرا تنگ کرتے ہیں خاص طور پر کاشت اور فصل کی کٹائی کے موسم میں تاکہ فلسطینیوں کو زبردستی اپنی زمینیں چھوڑنے پر مجبور کیا جا سکے اور بعد ازاں ان پر قبضہ کیا جا سکے۔

فلسطینی کسانوں نے کہا کہ راستوں کی بندش درجنوں خاندانوں کے روزگار کو شدید خطرے میں ڈال رہی ہے اور زرعی پیداوار کو براہ راست نقصان پہنچا رہی ہے جبکہ قابض اسرائیلی فوج کی جانب سے کسی قسم کا تحفظ فراہم نہیں کیا جاتا بلکہ یہ افواج ان حملوں کو تحفظ فراہم کرتی نظر آتی ہیں۔

ماہرین نے خبردار کیا ہے کہ یہ اقدامات بیت فوريك کے میدان پر مکمل کنٹرول مسلط کرنے کی ایک منظم پالیسی کا حصہ ہیں کیونکہ یہ علاقہ نابلس کے مشرق میں ایک نہایت اہم زرعی زون سمجھا جاتا ہے اور اس کا مقصد یہودی آبادکاری کے اثر و رسوخ کو وسعت دینا اور مزید فلسطینی زمین ہڑپ کرنا ہے۔