(روز نامہ قدس ۔آنلائن خبر رساں ادارہ ) سابق لیبر پارٹی رکن جیرمی کوربن نے بھی ریلی میں شرکت کی اور برطانیہ سمیت جی سیون ممالک سے مطالبہ کیا کہ وہ غزہ پر حملے کے معاملے پر اسرائیل کی حمایت کرنا چھوڑ دیں۔
تفصیلات کے مطابق گذشتہ روزبرطانیہ کےدارالحکومت لندن میں جی سیون اجلاس کے موقع پر اسرائیل مخالف احتجاجی ریلی کا انعقاد کیا گیا جس میں سماجی، سیاسی تنظیموں سے تعلق رکھنے والے افراد کے علاوہ ہزاروں شہریوں نے شرکت کی اور فلسطینیوں کے حق میں اسرائیلی پالیسیوں کیخلاف احتجاج کرتے ہوئےبھرپورنعرے بازی کی ، مظاہرین نے فلسطینیوں کے حق میں اور آزاد فلسطین کے بینرز اور پلے کارڈز اٹھا رکھے تھے ۔
جنوب مغربی انگلینڈمیں مقبوضہ فلسطین کے مظلوم شہروں کی حمایت میں نکالی جانےوالی اس ریلی نے برطانوی وزیراعظم بورس جانسن کی سرکاری رہائش گاہ ڈائوننگ اسٹریٹ کی جانب مارچ کیا جس میں مظاہرین مقبوضہ فلسطینی علاقوں میں اسرائیلی پالیسیوں کیخلاف سراپا احتجاج تھے۔
اسرائیل مخالف اس ریلی میں سابق لیبر پارٹی رکن جیرمی کوربن نے بھی ریلی میں شرکت کی اور برطانیہ سمیت جی سیون ممالک سے مطالبہ کیا کہ وہ غزہ پر حملے کے معاملے پر اسرائیل کی حمایت کرنا چھوڑ دیں، جیرمی کوربن نے کی جانب سے سماجی رابطوں کی ویب سائٹ ٹوئٹر پر بھی اپنے ایک پیغام میں کہا ہے کہ آج لندن میں فلسطینیوں کے انصاف کا دن ہے اور اسلحے کی فروخت کو روکا جائے۔انہوں نے کہا کہ برطانوی ساختہ ہتھیاروں سے بچوں سمیت شہریوں کی جانیں لی جارہی ہیں یہ سلسلہ رکنا چاہیے۔