بیروت – (روزنامہ قدس ـ آنلائن خبر رساں ادارہ) لبنان کی وزارت صحت نے اعلان کیا ہے کہ دو مارچ سنہ 2026ء سے لبنان پر جاری قابض اسرائیل کی مسلسل جارحیت کے نتیجے میں ہونے والے جانی نقصان کی تعداد بڑھ کر 1247 شہداء اور 3680 زخمیوں تک پہنچ گئی ہے۔
قابض اسرائیل کی یہ سفاکانہ جارحیت آج مسلسل انتیسویں روز بھی جاری ہے جس کے دوران فضائی حملوں اور توپ خانے کی گولہ باری کی شدت میں نمایاں اضافہ دیکھا گیا ہے۔ جنوبی لبنان کے مختلف علاقوں کو نشانہ بنانے والی اس مہم کے نتیجے میں مزید قیمتی جانوں کا زیاں ہوا ہے اور املاک سمیت بنیادی ڈھانچے کو وسیع پیمانے پر نقصان پہنچا ہے۔
وزارت صحت نے ایک گذشتہ بیان میں بتایا تھا کہ دارالحکومت بیروت کے جنوبی مضافاتی علاقے ضاحیہ کے مقام الرحاب پر قابض اسرائیل کے ایک فضائی حملے کے نتیجے میں ایک شخص شہید اور 17 دیگر افراد مختلف نوعیت کے زخموں سے دوچار ہوئے ہیں۔
دوسری جانب نیشنل نیوز ایجنسی نے اطلاع دی ہے کہ جنوبی لبنان کے شہر بنت جبیل کے وسط میں واقع تجارتی مرکز پر قابض اسرائیل کی بمباری کے نتیجے میں چار افراد جام شہادت نوش کر گئے ہیں۔
اسی تناظر میں لبنانی فوج نے بھی اپنے ایک سپاہی کی شہادت اور دیگر کے زخمی ہونے کا اعلان کیا ہے جو جنوبی شہر صور کے علاقے العامریہ میں ایک فوجی چیک پوسٹ پر قابض اسرائیل کی جانب سے کیے گئے حملے کا نشانہ بنے۔
یہ وحشیانہ تصادم ایک ایسے وقت میں جاری ہے جب فوجی کارروائیوں کے دائرہ کار میں مسلسل وسعت آ رہی ہے جس سے لبنان میں انسانی اور سکیورٹی صورتحال کے مزید ابتر ہونے کا سنگین خطرہ پیدا ہو گیا ہے۔
