(روز نامہ قدس ۔آنلائن خبر رساں ادارہ ) یہ کسی بھی اسرائیلی وزیراعظم کا مراکش کا پہلا ‘سرکاری دورہ’ ہوگا، یہ دورہ اسرائیل کی جانب سے مغربی صحارا پر مراکش کی خودمختاری کو تسلیم کئے جانے کے بعد کیا جارہا ہے۔
غیر قانونی صیہونی ریاست اسرائیل کے وزیراعظم نیتن یاہو کے دفتر سے جاری بیان کے مطابق مراکش کے شاہ محمد ششم نے نیتن یاہو کو مراکش کے سرکاری دورے کی دعوت دے دی۔ بیان میں بتایا گیا ہے کہ دورہ مراکش کیلئے تاریخ طے کرنے کے مرحلے میں ہیں۔
1986 میں صیہونی وزیراعظم شمعون پیریز نے اسرائیل کا دورہ کیا تھا ان کا استقبال شاہ محمد ششم کے والد شاہ حسن دوئم نے کیا تھا اس دور میں مراکش اور اسرائیل کے درمیان سفارتی تعلقات قائم نہیں ہوئے تھے۔
غیر ملکی خبر رساں ادارے کی رپورٹ کےمطابق مراکش کے شاہ محمد ششم نے مغربی صحارا میں مراکش کی خودمختاری تسلیم کرنے اور داخلہ شہر میں قونصل خانہ کھولنے کیلئے غور کرنے پر صیہونی وزیراعظم کا شکریہ ادا کیا۔
انہوں نے کہا کہ صحارا علاقے کا معاملہ ہمارا قومی مسئلہ ہے اور خارجہ پالیسی میں ترجیحی معاملہ ہے۔ شاہ محمد کا کہنا تھا کہ آپ کا فیصلہ بہت دور رس ہے کیونکہ یہ کئی ممالک کی طرف سے صحارا علاقے میں مراکش کی خودمختاری کو تسلیم کرنے سے مطابقت رکھتا ہے۔