اسرائیلی بربریت جاری، خان یونس میں دو بھائی شہید

غزہ ۔ روزنامہ قدس ـ آنلائن خبر رساں ادارہ

خان یونس کے مشرقی علاقے پر قابض اسرائیل کی وحشیانہ جارحیت کے نتیجے میں آج ہفتے کی صبح دو سگے بھائی شہادت کے درجے پر فائز ہو گئے، جب کہ قابض فورسز نے سیز فائر کی مسلسل خلاف ورزیاں جاری رکھتے ہوئے غزہ کے مختلف مشرقی علاقوں پر بے دریغ فضائی اور زمینی حملے تیز کر دیے ہیں۔

مقامی ذرائع نے بتایا کہ قابض اسرائیلی جنگی طیاروں نے آج صبح بنى سہیلا میں الفارابی سکول کے قریب بمباری کی جس کے نتیجے میں دو معصوم بھائی فادی اور جمعہ تامر ابو عاصی شہید ہو گئے۔ دونوں بچوں کی لاشوں کو شہر میں واقع ناصر ہسپتال منتقل کر دیا گیا۔

ایک دوسرے مقامی ذریعے کے مطابق قابض اسرائیل کے جنگی جہازوں نے غزہ شہر کے مشرقی علاقے التفاح پر بھی متعدد فضائی حملے کیے۔

اسی دوران اسرائیلی ہیلی کاپٹروں نے مشرقی خان یونس کی بلدہ بني سہیلا اور القرارہ پر مشین گنوں سے اندھا دھند فائرنگ کی، جس سے شہریوں میں خوف و ہراس پھیل گیا۔

آدھی رات کے بعد بھی قابض طیاروں نے مشرقی خان یونس میں تین الگ الگ فضائی حملے کیے۔

قابض اسرائیل نے غزہ شہر کے مشرقی حصے الشجاعیہ میں بھی ایک فضائی حملہ کیا۔

مقامی ذرائع کے مطابق قابض اسرائیلی توپ خانے نے جبالیہ کے مشرقی علاقوں (شمالی غزہ) کو بھی نشانہ بنایا۔

گذشتہ چھیالیس دنوں سے قابض اسرائیل کی طرف سے جاری اس جارحیت نے سیز فائر معاہدے کو کھلی آنکھوں سے روند ڈالا ہے۔ ان درندانہ حملوں کے آغاز سے لے کر اب تک 350 فلسطینی شہید ہو چکے ہیں، جن میں 130 معصوم بچے اور 54 خواتین شامل ہیں۔