(روز نامہ قدس ۔آنلائن خبر رساں ادارہ ) سعید خطیب زادہ نے کہا ہے کہ یہ فیصلہ ایٹمی پروگرام سے متعلق بات چیت پر نظر ثانی کا پہلا مرحلہ ختم ہونےکے بعد کیا گیا ہے۔
عالمی ذرائع ابلاغ کے مطابق ایرانی وزارت خارجہ کے ترجمان سعید خطیب زادہ نے کہا ہے کہ تہران نے 4+1 گروپ (روس، چین، فرانس، برطانیہ، جرمنی) کے ساتھ ویانا مذاکرات دوبارہ شروع کرنے کا فیصلہ کیا ہے۔
سعید خطیب زادہ نے کہا ہے کہ یہ فیصلہ ایٹمی پروگرام سے متعلق بات چیت پر نظر ثانی کا پہلا مرحلہ ختم ہونےکے بعد کیا گیا ہے۔
خطیب زادہ کا کہنا ہےکہ نئی ایرانی حکومت جوہری مذاکرات کے سابقہ چھ ادوار کا جائزہ لے رہی ہے جس کے بعد مذاکرات کے نئے دور کے آغاز کے لیے مقررہ عرصہ اُس دورانیے (90 روز) سے کم ہو گا جو امریکی صدر کی ٹیم کو مذاکرات میں واپسی کے لیے درکار ہوا۔
دوسری جانب اسرائیل ایران کو ہر سطح پر ایٹمی پروگرام دوبارہ شروع کر نے سے باز رکھنے کے لیے سنگین نتائج کی دھمکیاں دیتے ہوئے اکیلے ہی ایران کے خلاف اقدامات کرنے کا اعلان کر چکا ہے۔
خیال رہے کہ ایرانی وزیر خارجہ حسین امیر عبداللہیان نے بھی اپنے ایک بیان میں امید ظاہر کی ہے کہ جوہری معاہدے کی بحالی کے حوالے سے جاری بات چیت کے بعد مذاکرات بار آور ثابت ہوں گے بشرط یہ کہ امریکا اس حوالے سے مکمل پاسداری پر عمل کرے۔