(روز نامہ قدس ۔آنلائن خبر رساں ادارہ ) روسی نائب وزیر خارجہ نے کہا کہ روس اسرائیل اور فلسطین کے درمیان مذاکرات کےلیے ثالثی کا کردار ادا کرنے کو تیار ہے۔
غیرملکی خبر رساں ادارے کے مطابق گذشتہ روز روسی وزارت خارجہ کے جاری کردہ اعلامیے کے مطابق مشرق وسطیٰ اور افریقی ممالک کےلیے روسی صدر کے خصوصی نمائندے اور نائب وزیر خارجہ ایم ایل بوگڈ انوف نے روس کے دارالحکومت ماسکو میں اسرائیلی سفیر الیگزینڈر بین زوی سے ملاقات کی اورغزہ کی پٹی پر ہونے والی بمباری اور اسرائیل و فلسطین کے مابین جاری کشیدگی پر تبادلہ خیال کیا۔
روسی نائب وزیر خارجہ نے فلسطین میں جاری نسل کشی اور ظلم و بربریت پر تشویش کا اظہار کیا اور اسرائیل کی جانب سے طاقت کے استعمال پر دو ٹوک پیغام دیتے ہوئے کہا کہ بے گناہ انسانی جانوں کا زیاں روس کو کسی صورت قبول نہیں۔
ایم ایل بوگڈ انوف نے مقبوضہ فلسطین میں اسرائیلی بربریت کے خلاف دوٹوک مؤقف اپناتے ہوئےکہا ہے کہ اسرائیل بے گناہ انسانی جانوں کا زیاں فوری روکے،کشیدگی ختم کر نے کے لیے روس دونوں فریقین کے ساتھ مذاکرات کےلیے ثالثی کا کردار نبھانےکے لیے تیار ہے ۔
روسی حکام نے اسرائیلی بمباری کا نشانہ بننے والے فلسطینیوں کی تعداد میں اضافے پر بھی تشویش کا ا ظہار کیا اور فلسطین کے ساتھ مسئلے کو مذاکرات کی میز پر حل کرنے کا مشورہ دیا۔