(روز نامہ قدس ۔آنلائن خبر رساں ادارہ ) اسرائیلی وزیر دفاع نے کہا کہ اسرائیل نے ایران کو ایٹمی ہتھیار حاصل کرنے اور خطے میں ایران کے منفی رویے کو روکنے کا عزم کر رکھا ہے۔
عالمی خبر رساں ادارے کے مطابق گذشتہ روز اسرائیل کے وزیر دفاع بینی گینٹز نےاپنے ایک بیان میں کہا ہے کہ ایران کو ایٹمی ہتھیاروں کے حصول سے روکنے کے لیے جب اور جہاں بھی ضروری ہوا ان کا ملک کارروائی کرے گا۔
بیان میں بینی گینٹز نے کہا کہ ہم ایران کے ساتھ لڑائی کی حالت میں ہیں اور ہم اپنا دفاع کریں گےانہوں نے مزید کہا کہ اسرائیل نے ایران کو ایٹمی ہتھیار حاصل کرنے اور خطے میں ایران کے منفی رویے کو روکنے کا عزم کر رکھا ہے۔
واضح رہے کہ اس بیان سے چند گھنٹے قبل اسرائیلی وزیر دفاع نے نئے وزیراعظم نفتالی بینیت سے ملاقات کی تھی، جس کی توجہ کا مرکز ایران کا ایٹمی پروگرام اور اقوام متحدہ کے جوہری سرگرمیوں کی نگرانی کے ادارے ’انٹرنیشنل اٹامک انرجی ایجنسی‘ (آئی اے ای اے) کے بورڈ کی بحالی کے مذاکرات تھےاور اسرائیلی وزیر دفاع کا بیان ایسے وقت میں سامنے آیا ہے جب ہفتے کو متحدہ عرب امارات کے ساحل سے تھوڑے فاصلے پر ایک اسرائیلی مال بردار بحری جہاز پر حملہ ہوا تھا جبکہ گذشتہ سال ایرانی ایٹمی تنصیبات اور اسرائیلی بحری جہازوں پر کئی دھماکے ہوئے لیکن ایران اور اسرائیل نے ان حملوں کی ذمہ داری قبول نہیں کی۔