(روز نامہ قدس ۔آنلائن خبر رساں ادارہ ) یورپی یونین کے خصوصی مندوب نے کہا کہ اسرائیل کے فلسطین میں غیرقانونی اقدامات سے نہ صرف ماحول میں کشیدگی بڑھ رہی ہے بلکہ اس سے تشدد اور انسانی مشکلات میں بھی مزیداضافہ ہوگا۔
عالمی نشریاتی ادارے کے مطابق گذشتہ روز یورپی یونین کےفلسطین کے لیے خصوصی مندوب نے صدردفتر برسلز میں اپنے بیان میں اسرائیلی غیر قانونی آباد کاری اور فلسطینیوں کی املاک پر صہیونی حکام کے قبضے کوغیر قانونی قرار دیتے ہوئے اسرائیل سے مطالبہ کیا کہ وہ بین الاقوامی قانون کی کھلی خلاف ورزی سے باز آئے اور غیرقانونی اقدامات روکتے ہوئے فلسطینی آبادیوں میں تعمیرات کی فوری اجازت دے ساتھ ہی فلسطینی علاقوں میں ترقیاتی منصوبوں کوآگے بڑھانے کا موقع فراہم کرے۔
ان کا کہنا تھا کہ اسرائیل کےاس غیرقانونی اقدامات سے نہ صرف ماحول میں کشیدگی بڑھ رہی ہے بلکہ اس سے تشدد اور انسانی مشکلات میں بھی مزیداضافہ ہوگا۔
انہوں نے کہا کہ رام اللہ اور القدس میں یونین کے ہائی کمشنرز کا اس بات پر اتفاق ہے کہ اسرائیلی ریاست کے فلسطینیوں کے خلاف اقدامات غیرقانونی اور یک طرف ہیں جن کے نتیجے میں خطے میں تشدد میں اضافہ ہو رہا ہے۔
یورپی یونین کے فلسطین کے لیے خصوصی مندوب نے اسرائیلی حکام پر زور دیا کہ وہ فلسطینی شہریوں کو ان کے گھروں سے جبری بے دخل کرنا، فلسطینیوں کی املاک پر طاقت کے ذریعے قبضہ کرنا، مقبوضہ عرب علاقوں میں یہودی بستیوں کی تعمیر اور یک طرفہ طور پرغاصبانہ اقدامات کو ختم کرتے ہوئے بین الاقوامی قوانین کی پاس داری کرے۔