(روز نامہ قدس ۔آنلائن خبر رساں ادارہ ) او آئی سی نےحال ہی میں فلسطین کے شہر نابلس میں اسرائیلی فوج کے ہاتھوں نہتے فلسطینیوں کے قتل عام کی شدید مذمت کی اور اس واقعے کی عالمی سطح پر آزادانہ تحقیقات کا مطالبہ کیا۔
سعودی عرب کے شہر جدہ میں اسلامی ممالک کی تعاون تنظیم (او آئی سی) کے اجلاس سے خطاب کرتے ہوئے اورگنائزیشن کے سکریٹری جنرل حسین ابراہیم طہ نے فلسطین پر قابض غیر قانونی صیہونی ریاست اسرائیل کے غرب اردن کے شہر نابلس صیہونی فوج کے ہاتھوں نہتے فلسطینیوں کے قتل عام کی شدید مذمت کی اور اس واقعے کی عالمی سطح پر آزادانہ تحقیقات کا مطالبہ کرتے ہوئے کہا ہے کہ فلسطینیوں کے خلاف اسرائیلی کارروائیاں انسانیت کے خلاف جرم ہیں۔
سکریٹری جنرل نے کہا ہے کہ اسرائیلی ریاست کو بے لگام چھوڑنے سے اسے فلسطینیوں کےخلاف جرائم پر قائم رہنے کا موقع دیا گیا ہے اور اس کے جرائم پر خاموشی نے فلسطینیوں پر مظالم میں اضافہ کیا ہے ، انھوں نے کہا کہ صیہونی ریاست کے فلسطینیوں کے خلاف اقدامات انسانیت کے خلاف جرائم میں شامل ہیں۔
انہوں نے کہا کہ اب وقت آگیا ہے کہ اسرائیلی ریاست کے انسانیت کےخلاف جرائم پر اس کو کٹہرے میں لایا جائے۔