(روزنامہ قدس ۔آنلائن خبر رساں ادارہ ) اسرائیل عرب اور افریقی ممالک کے ساتھ تعلقات کو مزید مضبوط بنانے کیلئے مسلسل کوششوں میں مصروف ہے اس سلسلے میں اسرائیلی وزیرخارجہ آئندہ ماہ عرب افریقی ملک مراکش کا دورہ کریں گے جہاں مختلف معاہدوں پر سمجھوتہ کیا جائے گا۔
صیہونی ریاست اسرائیل کے معروف اخبار یروشلم پوسٹ نے اپنی رپورٹ میں انکشاف کیا ہے کہ آئندہ ماہ اسرائیلی وزیرخارجہ يائر ليپد مراکش کے ساتھ تعلقات کو مزید مضبوط کرنے کیلئے رباط کا دورہ کریں گے، يائر ليپد نے اس حوالے سے مراکشی وزیر خارجہ ناصر بوریتہ سے ٹیلی فونک گفتگو کی ہے اس دورے پر اتفاق کیاہے جہاں متعدد سمجھوتوں پر دستخط کئے جائیں گے۔
اسرائیلی ذرائع نے بتایا کہ یہ دورہ 10 یا 11 اگست کو متوقع ہے، جو عالمی وبا کورونا وائرس کے حالات سے مشروط کیا گیا ہے، ذرائع کا کہناہے کہ اگر کورونا وائرس کی صورتحال قابو میں رہی تو یہ دورہ کیا جائے گا بصورت دیگر اس کی تاریخ میں توسیع کی جاسکتی ہے۔
واضح رہے کہ یائر لیپد مراکش کا دورہ کرنے والے پہلے اسرائیلی وزیر ہوں گے اس سے قبل مراکش کے اسرائیل کے ساتھ تعلقات نہیں تھے۔