نیویارک – (روزنامہ قدس ـ آنلائن خبر رساں ادارہ) اقوام متحدہ کے ہائی کمشنر برائے مہاجرین (یو این ایچ سی آر) نے بتایا ہے کہ لبنان کے اندر بے گھر ہونے والے افراد کی تعداد تقریباً 7 لاکھ 80 ہزار تک پہنچ گئی ہے، جبکہ شام کی سرحد عبور کرنے والے لبنانی پناہ گزینوں کی تعداد 7 ہزار 800 سے زائد نہیں ہے۔
کمیشن نے اس بات کی تصدیق کی ہے کہ لبنان کے اندر داخلی طور پر بے گھر ہونے والوں کی شرح خطے میں نقل مکانی کی مجموعی لہر کے 75 فیصد سے زیادہ نہیں بڑھی۔ کمیشن نے اس جانب اشارہ کیا کہ لبنان، عراق، شام، ایران اور افغانستان میں قابض اسرائیل اور امریکہ کی مسلط کردہ جنگوں کی وجہ سے اپنے ہی ممالک کے اندر دربدر ہونے والے افراد کی کل تعداد 8 لاکھ 84 ہزار 700 تک پہنچ چکی ہے۔
لبنان کی وزیر برائے سماجی امور، حنین السيد نے پیر کے روز اعلان کیا کہ ریاست عوامی تحفظ کو یقینی بنانے اور منظم و فوری امدادی کارروائیوں کے لیے اپنی تمام تر توانائیاں بروئے کار لانے کے لیے پرعزم ہے۔
حنین السيد نے انکشاف کیا کہ مختلف علاقوں میں سرکاری سکول اور جامعات سمیت 567 سے زائد پناہ گاہیں کھولی گئی ہیں، جن کے انتظامی امور وزارت سماجی امور کی نگرانی میں وزارت تعلیم اور دیگر شراکت داروں کے تعاون سے منظم کیے جا رہے ہیں۔
واضح رہے کہ قابض اسرائیل کی فوج نے گذشتہ ہفتے حزب اللہ کے خلاف ایک جارحانہ معرکے کے آغاز کا اعلان کیا تھا۔ قابض اسرائیل کے جنگی طیاروں نے جنوبی لبنان اور بیروت کے جنوبی ضاحیہ کے علاقوں پر وحشیانہ فضائی حملوں کا سلسلہ شروع کر رکھا ہے، جبکہ قابض اسرائیل کی فوج نے کئی روز تک جاری رہنے والی طویل لڑائی کے لیے تیار رہنے کا عندیہ دیا ہے۔
