بیروت – (روزنامہ قدس ـ آنلائن خبر رساں ادارہ) لبنانی وزارت صحت نے اعلان کیا ہے کہ 2 مارچ سے لے کر 17 مارچ سنہ 2026ء تک لبنان پر جاری قابض اسرائیلی جارحیت کے نتیجے میں شہدا کی مجموعی تعداد 912 ہو گئی ہے جبکہ 2221 افراد زخمی ہوئے ہیں۔
وزارت صحت نے اپنی روزانہ کی رپورٹ میں واضح کیا ہے کہ ملک کے مختلف حصوں پر قابض اسرائیل کے سفاکانہ فضائی حملوں کے نتیجے میں گذشتہ چوبیس گھنٹوں کے دوران مزید 26 افراد جامِ شہادت نوش کر گئے اور 80 زخمی ہوئے ہیں۔
قابض اسرائیل کی جانب سے لبنان کے متعدد علاقوں بالخصوص جنوبی لبنان کے قصبوں اور بیروت کے جنوبی مضافاتی علاقے (ضاحیہ) کو شدید فضائی حملوں کا نشانہ بنانے کا سلسلہ مسلسل جاری ہے جس میں معصوم شہریوں کو خون میں نہلایا جا رہا ہے۔
اسی تناظر میں وزارت صحت نے قبل ازیں بتایا تھا کہ بیروت میں ایئرپورٹ روڈ کو نشانہ بنانے والے ایک حملے میں ایک شہری شہید اور نو دیگر زخمی ہو گئے۔
لبنانی خبر رساں ایجنسی کے مطابق جنوبی لبنان کے قصبوں عبا اور جبشیت کے درمیان ایک گاڑی کو ڈرون حملے کا نشانہ بنایا گیا جس کے نتیجے میں ایک شخص شہید اور دوسرا زخمی ہو گیا جبکہ قابض دشمن کے جنگی طیاروں نے تول نامی قصبے میں ایک رہائشی عمارت کو مکمل طور پر تباہ کر دیا۔
رپورٹ میں مزید بتایا گیا ہے کہ ایک اور حملہ سلطانیہ نامی قصبے میں ایک گاڑی پر کیا گیا جس میں ایک شہری شہید ہو گیا جبکہ لبنانی فوج نے اپنے ایک اہلکار کی شہادت کا اعلان کیا ہے جو نبطیہ کے علاقے قعقعیہ الجسر میں ہونے والے حملے میں لگنے والے زخموں کی تاب نہ لاتے ہوئے دم توڑ گیا۔ اس حملے میں پانچ دیگر فوجی اہلکار بھی زخمی ہوئے ہیں۔
