(روز نامہ قدس ۔آنلائن خبر رساں ادارہ ) حماس رہنما نے فلسطینی اتھارٹی کی سکیورٹی فورسز کے ہاتھوں قائم الحریہ والکرامہ اتحاد کے سربراہ اور سینیر سماجی کارکن نزار بنات کے قتل کی شدید مذمت کی اور مطالبہ کیا کہ قاتلوں کو احتساب کے کٹہرے میں لا کر عبرت ناک سزا دی جائے۔
مقبوضہ فلسطین میں اسلامی مزاحمتی تحریک حماس کے سیاسی دفتر کے رکن سمیع ابو ظہری کی جانب سے فلسطینی اتھارٹی کے ماتحت سیکیورٹی اہلکاروں کےہاتھوں وحشیانہ تشدد میں فلسطینی پارلیمانی انتخابات کے لیے قائم الحریہ والکرامہ اتحاد کے سربراہ اور سینیر سماجی کارکن نزار بنات کے قتل کی شدید مذمت کرتے ہوئے فلسطینی اتھارٹی کو اس سنگین جرم کا ذمہ دار قرار دیا ہے اور وزیر اعظم محمد اشتیہ سے مطالبہ کیا ہے کہ وہ قاتلوں کو احتساب کے کٹہرے میں لا کر عبرت ناک سزا دیں۔
انھوں نےصدرمحمودعباس کے زیرقیادت فلسطینی اتھارٹی پر بدعنوانیوں میں ملوث ہونے کا الزام عائد کیا تھااور فلسطینی صدر پرمئی میں طویل عرصے سے التوا کا شکار انتخابات کو مزید کچھ عرصہ کے لیے ملتوی کرنے اور رواں ماہ اسرائیل کے ساتھ کورونا وائرس کی زایدالمیعادویکسین کے تبادلے کی ڈیل پرکڑی تنقید کی تھی۔
واضح رہے کہ گذشتہ روز قابض ریاست اسرائیل میں فلسطینی اتھارٹی کے سکیورٹی اہلکاروں نے سینیر سماجی کارکن نزار بنات کو علی الصبح ان کے گھر میں گھس کر تشدد کا نشانا بنایا تھا اور گرفتار کر کے نامعلوم مقام پر منتقل کر دیا تھا جس کے بعد شام ڈھلے بنات کو مردہ حالت میں ان کے اہل خانہ کے سپرد کرتے ہوئے اطلاع دی کہنزار بنات کی زیر حراست طبعی موت واقع ہوگئی۔