(روز نامہ قدس ۔آنلائن خبر رساں ادارہ ) ایمازون اور گوگل کے ملازمین کا کہنا ہے کہ ہماری کمپنیوں کی جانب سے فراہم کردہ سروسز کی مدد سے اسرائیلی فوج اور حکومت کوفلسطینیوں کے خلاف کیے جانے والے منظم امتیازی سلوک اور انہیں گھروں سے بے دخلی کے ظالمانہ عمل کوتقویت ملےگی۔
عالمی ذرائع ابلاغ کے مطابق امریکہ کی ٹیکنالوجی کمپنی گوگل اور آن لائن کاروبار کی معروف ویب سائٹ ایمازون کے ملازمین کی جانب سے رواں سال اسرائیل کے ساتھ کیے جانے والے کلاؤڈ سروس معاہدے کی منسوخی کا مطالبہ کردیاگیا ہے۔
رپورٹ کے مطابق ایمازون اور گوگل کے 400 سے زائد ملازمین نے برطانوی اخبارمیں شائع کیے گئےایک مشترکہ خط میں اپنے اداروں سے مطالبہ کیا ہےکہ وہ اسرائیلی فوج اور حکومت کے ساتھ ایک ارب 20 کروڑ ڈالرمالیت کی کلاؤڈ سروس کی فراہمی کے اس معاہدے کو معطل کریں۔
خط میں کہا گیا ہےکہ یہ معاہدہ مئی میں اسی دوران کیا گیا جب اسرائیل کی جانب سے غزہ پر بمباری کے نتیجے میں 60 بچوں سمیت 250 افراد جاں بحق ہوگئے تھے۔
خیال رہے کہ ایمازون اور گوگل کے ملازمین کا کہنا ہے کہ ہماری کمپنیوں کی جانب سے فراہم کردہ سروسز کی مدد سے اسرائیلی فوج اور حکومت کوفلسطینیوں کے خلاف کیے جانے والے منظم امتیازی سلوک اور انہیں گھروں سے بے دخلی کے ظالمانہ عمل کوتقویت ملےگی۔