(روز نامہ قدس ۔آنلائن خبر رساں ادارہ) غیر قانونی صیہونی ریاست اسرائیل کے وزیر دفاع یسرائیل کاٹز کی تجویز پر اسرائیلی کابینہ برائے سیکیورٹی اور سیاسی امور نے ایک نئی انتظامیہ قائم کرنے کی منظوری دی ہے، جس کا مقصد غزہ سے فلسطینیوں کو "رضاکارانہ” دوسرے ممالک میں منتقل کرنے کے عمل کو منظم اور آسان بنانا ہے۔
وزیر دفاع کے دفتر سے جاری ہونے والے بیان کے مطابق، یہ نئی انتظامیہ غزہ سے جانے کے خواہش مند فلسطینیوں کے لیے محفوظ راستوں کی فراہمی کو یقینی بنائے گی۔ اس کے تحت فلسطینیوں کے دوسرے ممالک میں نقل مکانی کے عمل کے دوران بین الاقوامی تنظیموں اور متعلقہ اداروں کے ساتھ مکمل ہم آہنگی اور تعاون کو یقینی بنایا جائے گا۔
اس عمل میں غزہ کے مخصوص گزرگاہوں کے ذریعے فلسطینیوں کی نقل مکانی کے لیے راستوں کا انتظام کیا جائے گا، اور فلسطینیوں کی منتقلی زمینی، سمندری اور فضائی راستوں کے ذریعے کی جائے گی۔
غیر قانونی صیہونی ریاست اسرائیل کے اس اقدام کو فلسطینیوں کی جائیداد اور زمینوں سے جبری بے دخلی کی ایک اور کوشش کے طور پر دیکھا جا رہا ہے، جسے عالمی سطح پر شدید تنقید کا سامنا ہے۔