جکارتہ – (روزنامہ قدس ـ آنلائن خبر رساں ادارہ) انڈونیشی فوج کے ترجمان نے اعلان کیا ہے کہ ان کا ملک مجوزہ کثیر القومی امن فورس کے حصے کے طور پر آئندہ اپریل کے اوائل میں غزہ کی پٹی بھیجنے کے لیے ایک ہزار فوجی اہلکار تیار کر رہا ہے۔
روئٹرز نے ترجمان ڈونی پرامونو کے حوالے سے نقل کیا ہے کہ اس مشن میں شرکت کے حوالے سے حتمی فیصلہ انڈونیشیا کے صدر پرابوو سوبیانتو کریں گے۔
انہوں نے اشارہ کیا کہ جون تک تعیناتی کے لیے تیار فوجیوں کی کل تعداد 8 ہزار تک پہنچ جائے گی۔ انہوں نے مزید کہا کہ روانگی کا شیڈول "ابھی تک مکمل طور پر ریاست کے سیاسی فیصلوں اور متعلقہ بین الاقوامی میکانزم کے تابع ہے”۔
یہ اہم پیش رفت ایک ایسے وقت میں سامنے آئی ہے جب صدر سوبیانتو واشنطن جانے کی تیاری کر رہے ہیں تاکہ وہ "امن کونسل” کے پہلے سرکاری اجلاس میں شرکت کر سکیں جس کی صدارت امریکی صدر ڈونلڈ ٹرمپ کریں گے اور یہ اجلاس 19 فروری کو امریکہ میں منعقد ہونا طے پایا ہے۔
یہ سب کچھ سات اکتوبر سنہ 2023ء سے غزہ کی پٹی پر مسلط قابض اسرائیل کی تباہ کن جنگ کو ختم کرنے کے لیے جاری بین الاقوامی کوششوں کے تناظر میں ہو رہا ہے۔
اقوام متحدہ کی سلامتی کونسل نے اس کونسل کے قیام کی منظوری دی تھی جس سے غزہ کی پٹی میں امن برقرار رکھنے کے مشن کے لیے بین الاقوامی فورس کی تشکیل کی راہ ہموار ہوئی۔
انڈونیشیا کی وزارت خارجہ نے زور دے کر کہا کہ بین الاقوامی استحکام فورس میں ان کی فوج کی شرکت کو ہرگز کسی بھی فریق کے ساتھ سیاسی تعلقات کو معمول پر لانے (نارملائزیشن) سے تعبیر نہیں کیا جانا چاہیے۔
انہوں نے دو ٹوک الفاظ میں تصدیق کی کہ جکارتہ قابض اسرائیل کو تسلیم نہیں کرتا اور نہ ہی اس کے ساتھ کوئی سفارتی تعلقات رکھتا ہے۔ انڈونیشیا فلسطینی عوام کی آبادیاتی تبدیلی، نقل مکانی یا جبری بے دخلی کی تمام سازشوں کو ہر شکل میں مسترد کرتا ہے۔
مجوزہ بین الاقوامی سکیورٹی فورس کو غزہ کی قابض اسرائیل اور مصر کے ساتھ سرحدوں کو محفوظ بنانے، عام شہریوں اور انسانی ہمدردی کی راہداریوں کی حفاظت کرنے اور ایک نئی فلسطینی پولیس فورس کو تربیت دینے کا کام سونپا جائے گا جو اپنے فرائض کی ادائیگی میں اس کے ساتھ شریک ہوگی۔
نیز بین الاقوامی فورس غزہ میں سکیورٹی کو مستحکم کرنے اور غزہ کی پٹی میں انسانی امداد اور تعمیر نو کے سامان کی ترسیل کو یقینی بنانے کے لیے کام کرے گی۔ سکیورٹی فورس کو بین الاقوامی قانون بشمول بین الاقوامی انسانی قانون کے مطابق اپنے مینڈیٹ پر عمل درآمد کے لیے ضروری اقدامات استعمال کرنے کا اختیار دیا جائے گا۔
