مقبوضہ مغربی کنارہ – (روزنامہ قدس ـ آنلائن خبر رساں ادارہ) مرکز معلومات فلسطین ’معطی‘ نے اپنی ماہانہ رپورٹ میں انکشاف کیا ہے کہ فروری سنہ 2026ء کے دوران قابض اسرائیلی افواج اور انتہا پسند یہودی آباد کاروں نے مقبوضہ مغربی کنارے اور القدس شہر میں 6248 خلاف ورزیوں کا ارتکاب کیا ہے۔ یہ خلاف ورزیاں براہِ راست حملوں اور ظالمانہ اقدامات پر مشتمل تھیں جنہوں نے فلسطینی زندگی کے تمام شعبوں کو بری طرح متاثر کیا۔
رپورٹ کے اعداد و شمار کے مطابق اسی مدت کے دوران قابض اسرائیل کی سفاکیت کے نتیجے میں 8 فلسطینی شہید اور 229 زخمی ہوئے، جبکہ 823 فلسطینیوں کو گرفتار اور 59 کو حراست میں لیا گیا۔
رپورٹ میں بتایا گیا ہے کہ قابض دشمن نے 1208 مرتبہ فلسطینی علاقوں پر دھاوا بولا اور گھروں و تنصیبات پر 1137 چھاپے مارے۔ اس کے علاوہ فوجی چوکیوں کے ذریعے آمد و رفت پر 1139 پابندیاں عائد کی گئیں اور مختلف علاقوں و قصبوں کی 319 مرتبہ ناکہ بندی کی گئی۔
فلسطینی املاک کو نشانہ بنانے کے حوالے سے مرکز نے 47 گھروں کی مسماری اور 203 املاک کی تباہی ریکارڈ کی۔ مزید برآں 93 مقامات پر فلسطینیوں کا سامان اور جائیدادیں غصب کی گئیں۔ رپورٹ میں قابض ریاست کی 51 استیطانی سرگرمیوں اور انتہا پسند آباد کاروں کی جانب سے شہریوں اور ان کے اثاثوں پر 500 حملوں کی دستاویزات بھی پیش کی گئی ہیں۔
رپورٹ میں مزید اشارہ کیا گیا ہے کہ قابض اسرائیلی افواج نے 302 مرتبہ براہِ راست فائرنگ کی اور 83 فلسطینیوں کو بے دخلی کے احکامات جاری کیے۔ علاوہ ازیں مقدسات کی 35 مرتبہ بے حرمتی کی گئی جبکہ صحافیوں اور طبی عملے کے خلاف 7 اور تعلیمی شعبے کے خلاف 6 سنگین خلاف ورزیاں ریکارڈ کی گئیں۔
