ایتمار بن گویر کا مسجد اقصیٰ پر دھاوا، فلسطینیوں کی نقل و حرکت مکمل بند

مقبوضہ مغربی کنارہ – (روزنامہ قدس ـ آنلائن خبر رساں ادارہ) قابض حکومت کے نام نہاد وزیر برائے قومی سکیورٹی ایتمار بن گویر نے پیر کی شام غاصب اسرائیلی افواج کی سنگین حفاطت میں باب المغاربہ کے راستے مسجد اقصیٰ کے مقدس صحنوں پر دھاوا بول دیا۔

القدس میں محکمہ اوقاف اسلامی نے اطلاع دی ہے کہ بن گویر نے مسجد کے صحنوں کے اندر گشت کیا، وہ باب المغاربہ سے داخل ہو کر باب السلسلہ تک پہنچا اور پھر پولیس اہلکاروں کی بھاری نفری کی موجودگی میں اسی راستے سے واپس روانہ ہو گیا۔

قابض افواج نے مسجد اقصیٰ کے گرد و نواح میں سخت فوجی اقدامات نافذ کر دیے تھے جس کے دوران قدیم شہر کے دروازوں کو بند کر دیا گیا، جس سے فلسطینیوں کی نقل و حرکت محدود ہو گئی اور انہیں مسجد تک پہنچنے سے روک دیا گیا۔

یہ دھاوا آباد کار گروہوں کی جانب سے دھاووں میں تیزی لانے کی بڑھتی ہوئی اپیلوں کے سائے میں کیا گیا ہے جو کہ ایک جارحانہ پالیسی کا حصہ ہے۔ ایتمار بن گویر سنہ 2023ء میں اپنا عہدہ سنبھالنے کے بعد سے اب تک تقریباً 14 مرتبہ قبلہ اول پر دھاوا بول چکا ہے۔

وزارت اوقاف کی جانب سے دھاوے کی مذمت

وزارت اوقاف و مذہبی امور نے نام نہاد وزیرِ قومی سکیورٹی ایتمار بن گویر کے مسجد اقصیٰ پر دھاوے کی شدید مذمت کی ہے۔ یہ دھاوا ایک ایسے وقت میں بولا گیا ہے جب جنگ کے آغاز سے ہی ہنگامی حالت کے بہانے مسجد اقصیٰ مسلسل 38ویں روز بھی بند ہے، یہ قدم انتہائی خطرناک ہے جو مسلمان نمازیوں کی عدم موجودگی میں مسجد اقصیٰ کے مذہبی اور روحانی تقدس کو پامال کرنے کے مترادف ہے، جس سے اس وقت اور اس خاص موقع پر کیے جانے والے دورے کے مقاصد کے حوالے سے شدید خدشات پیدا ہو گئے ہیں۔

وزارت نے اس بات پر زور دیا کہ انتہا پسند دائیں بازو کی حکومت اپنے وزراء کے ان دھاووں کے ذریعے ایک ایسی مقدس جگہ پر کھلی جارحیت کر رہی ہے جو خالصتاً مسلمانوں کی ہے، اور ان کی اجازت کے بغیر کسی دوسرے کو وہاں داخل ہونے کا کوئی حق نہیں ہے۔ مزید برآں، یہ لوگ اکثر اوقات وہاں اپنی عبادت کی رسومات ادا کرتے ہیں جو کہ ایک گھناؤنا جرم اور اسلامی مقدسات و عبادت گاہوں پر حملہ ہے، خاص طور پر جب کہ یہ خلاف ورزیاں انتہا پسند اسرائیلی حکومت کے زیرِ سایہ اب ایک بڑھتا ہوا رجحان بن چکی ہیں۔

وزارت نے اسلامی اور عرب اداروں سے مطالبہ کیا ہے کہ وہ قبلہ اول اور تیسرے حرم شریف کے دفاع کے لیے اپنی ذمہ داریاں پوری کریں اور اس کی تالا بندی کے معاملے کو بین الاقوامی رائے عامہ کا مسئلہ بنائیں تاکہ اس پر عائد تالا بندی اور روزانہ کا محاصرہ ختم ہو سکے اور نمازیوں و معتکفین کو وہاں پہنچنے اور نماز ادا کرنے سے روکنے کا سلسلہ بند ہو۔

اسی طرح وزارت نے بین الاقوامی اداروں سے مطالبہ کیا کہ وہ مسجد اقصیٰ کے دفاع کے لیے فوری اور ہنگامی طور پر متحرک ہوں جو کہ اس وقت اسرائیل کے شدید حملے کی زد میں ہے۔ وزارت نے اپنے عوام سے بھی مطالبہ کیا کہ وہ اس قبضے کے کسی بھی حملے کو ناکام بنانے کے لیے اقصیٰ کے اندر مرابطت اور ثابت قدمی کا مظاہرہ کریں۔

اسی تناظر میں، قابض حکام نے ہنگامی حالت اور سکیورٹی حالات کے بہانے مسلسل 38ویں روز بھی مسجد اقصیٰ اور کنیسہ قیامہ (کنیستہ القیامہ) کی تالا بندی جاری رکھی ہوئی ہے۔

ان اقدامات کو مسجد پر مزید کنٹرول حاصل کرنے کی کوشش کے طور پر دیکھا جا رہا ہے، جبکہ دوسری جانب عوامی سطح پر محاصرہ توڑنے اور مسجد کو دوبارہ کھلوانے کے لیے اس کے گرد و نواح میں موجود فوجی چیک پوسٹوں کی طرف جمع ہونے کی اپیلیں کی جا رہی ہیں۔