(روز نامہ قدس ۔آنلائن خبر رساں ادارہ ) صہیونی فوج نے کہا ہے کہ فلسطینی نوجوانوں نے اسرائیلی فوجیوں پر گاڑی چڑھانے کی کوشش کی جس کے جواب میں فائرنگ کی گئی۔
فلسطینی ذرائع کے مطابق آج صبح صہیونی فورسز نے مقبوضہ مغربی کنارے کے شہر رام اللہ کے علاقے البیرہ میں الجلزون پناہ گزین کیمپ پر ایک گاڑی پر فائرنگ کی جس کے نتیجے میں دو فلسطینی نوجوان خالد عنبر الدباس اور باسل البسبوس شہید جبکہ ایک نوجوان شدید زخمی ہوگیا ۔
اسرائیلی فوج کے ریڈیو کی جانب سے جاری کردہ بیان میں بتایا گیا ہے کہ اسرائیلی فوج نے الجلزون پناہ گزین کیمپ میں کارروائی کی اس دوران ایک گاڑی نے تیز رفتاری سے اسرائیلی فوجیوں کو کچلنے کی کوشش کی جس کے ردعمل میں صہیونی فورسز نے فائرنگ کی ۔
سوشل میڈیا پر وائرل ویڈیوز میں دیکھا جاسکتا ہے کہ اسرائیلی فوجیوں نے فلسطینی نوجوانوں کی گاڑی پر فائرنگ اس وقت کی جب وہ معمول کی رفتار سے گزررہے تھے ، اسرائیلی فوجیوں نے فلسطینی نوجوانوں کو زخمی کرنے کے بعد 45 منٹ تک بغیر کسی طبی امداد کے زخمی حالت میں ہی سڑک پر چھوڑ دیا جس ے باعث خون بہہ جانے سے دونوں نوجوانوں کی شہادت ہوگئی ۔
عینی شاہدین کا کہنا ہے کہ اسرائیلی فوجیوں نے گھات لگا کر فلسطینی نوجوانوں کو نشانہ بنایا، اسرائیلی فوج کا حملےکا دعویٰ جھوٹ کے سوا کچھ بھی نہیں۔