(روزنامہ قدس ۔آنلائن خبر رساں ادارہ) اسرائیلی اخبار نے انکشاف کیا ہے کہ دبئی کی پولیس نے ایکسپو نمائش کی سیکیورٹی کے لیے اسرائیلی ساختہ ڈرون سسٹم کا انتخاب کیا جو اسرائیلی ٹیکنالوجی پر اعتماد کا منہ بولتا ثبوت ہے۔
تفصیلات کے مطابق صیہونی ریاست کے معروف اخبار’گلوبز‘ کی رپورٹ میں انکشاف کیا گیا ہے کہ دبئی میں ہونے والی ایکسپو2020ء کی بین الاقوامی نمائش کے دوران سیکیورٹی کے لیے متحدہ عرب امارات نے اسرائیلی ساختہ ڈرون طیاروں کا استعمال کیا تھا۔ عبرانی اخبار کے مطابق دبئی کی پولیس نے ایکسپو نمائش کی سیکیورٹی کے لیے اسرائیلی ڈرون سسٹم کا انتخاب کیا۔ رپورٹ کے مطابق رواں سال ہونے والی نمائش میں بھی پورے شہر میں اسرائیلی ساختہ ڈرونز کو استعمال کیا جائے گا۔
رپورٹ میں کہا گیا ہے کہ رواں سال اکتوبر میں ہونے والی ایکسپو نمائش کے موقعے پراسرائیلی ڈرونز کا استعمال کیا جائے گا۔خیال رہے کہ ایکسپو 2020ء گذشتہ برس کرونا وبا کی وجہ سے رواں سال اکتوبر تک ملتوی کردی گئی تھی۔