(روز نامہ قدس ۔آنلائن خبر رساں ادارہ ) شامی شہر حمص صیہونی ریاست کی فضائیہ کی بمباری میں 10 افراد کے جاں بحق ہونے کی اطلاعات ہیں، شامی ائر ڈیفنس سسٹم نے متعدد اسرائیلی حملوں کو روکا تاہم پھر بھی بعض میزائل ہدف تک پہنچنے میں کامیاب ہوئے۔
صیہونی ریاست کے حملوں کی اطلاع دینے والی شام کی انسانی حقوق کی تنظیم "سیرئین ہیومن رائٹس آبزرویٹری کے مطابق ایک مہینے کے توقف کے بعد اسرائیل نے منگل اور بدھ کی درمیانی شب دمشق ہوائی اڈے کے اطراف میں فوج کے مختلف ٹھکانوں کو نشانہ بنایا جس کے باعث پورا علاقہ زوردار دھماکوں سے لرز اٹھا۔
وسطی شام کی گورنری حمص کے علاقے الضمیر میں شامی ایئر ڈیفنس کے علاقے میں بھی زوردار دھماکوں کی آوازیں سنی گئیں۔حماہ اور اللاذقیہ گورنریوں میں بھی زوردار دھماکوں کی آوازیں سنی گئیں جن کے بارے میں گمان ظاہر کیا جا رہا ہے کہ وہ شامی اینٹی ائرکرافٹ توپوں کی جوابی کارروائی معلوم ہوتی ہے جو حملہ آور اسرائیلی جہازوں کو گرانے کے لیے کی گئی، حملوں میں سات فوجیوں سمیت دس افراد کے جاں بحق ہونی کی اطلاعات ہیں۔