(روز نامہ قدس ۔آنلائن خبر رساں ادارہ ) فلسطینی باشندوں پر بمباری اورانسانیت سوز مظالم کے خلاف اسرائیل پہ پابندیاں لگانے کے لیےبر طانوی پارلیمنٹ میں دائر کی گئی پٹیشن پر ڈھائی لاکھ سے زائد افراد نے دستخط کردیے ہیں۔
ذرائع کے مطابق قابض ریاست اسرائیل میں صہیونی فوج کی مظلوم فلسطینیوں پر کی جانے والی وحشیانہ بمباری اور ڈھائے جانے والے انسانیت سوز مظالم کے خلاف برطانوی عوام نے بھی آواز اٹھائی ہے اور برٹش قانون کے مطابق برطانوی پارلیمنٹ کی ویب سائٹ پر اسرائیل پہ پابندیاں عائد کر نے کے لیے پٹیشن پر ڈھائی لاکھ سے زائد افراد نے دستخط کردیے ہیں۔
واضح رہے کہ برطانوی قواعد و ضوابط کے تحت جس پٹیشن پر ایک لاکھ افراد کے دستخط ہوں وہ پارلیمنٹ میں پیش کی جا سکتی ہے جس کے بعد اب پٹیشن کے پارلیمنٹ میں بحث کے لیے پیش ہونے کے امکانات واضح ہوئے ہیں اور عوامی رد عمل کے نتیجے میں امید ہے کہ دنیا پر حکومت کر نے والی عالمی طاقتیں فلسطین کے لیے انصاف کا حصول آسان بنائیں گی۔