(روزنامہ قدس ۔آن لائن خبر رساں ادارہ) بھارتی اہلکاروں نےبغیر کسی وجہ اور اعلان کے ایک گھر کو بارود سے اُڑادیا جس سے گھر میں موجود نوجوان شہید ہوگیا، شہید نوجوان کی لاش بھی جھلسنے کے باعث ناقابل شناخت ہو گئی۔
کشمیر میڈیا سرو س کے مطابق گذشتہ روز وادی کشمیرکے ضلع اسلام آباد میں بھارتی قابض فوج کی ریاستی دہشت گردی جاری ہے جس کا نشانہ بنتے ہوئے ایک اور بے گناہ کشمیری نوجوان کو شہید کر دیا گیا، بھارتی اہلکاروں نےبغیر کسی وجہ اوراعلان کے ایک گھر کو بارود سے اُڑادیا جس سے گھر میں موجود نوجوان شہید ہوگیا، بارودی مواد کے دھماکے میں گھر مکمل طور پر تباہ ہوگیااور شہید ہونے والے نوجوان کی لاش بھی جھلسنے کے باعث ناقابل شناخت ہو گئی۔
بھارتی اہلکاروں نے نام نہاد سرچ آپریشن کی آڑ میں ضلعے کے داخلی و خارجی راستوں کی ناکہ بندی کرکے گھر گھر تلاشی کے دوران کشمیریوں کو وحشیانہ تشدد کا نشانہ بنایا اور خواتین کی بے حرمتی کرتے ہوئے چادر اور چار دیواری کے تقدس کو پامال کیا۔
بھارتی فوج کی اس بربریت کے نتیجے میں کشمیری نوجوانوں اور علاقے کے دیگرافراد نے احتجاجی مظاہرہ کیا جس پر قابض فوج نے اندھا دھند فائرنگ شروع کر دی جس سےکئی افراد کے زخمی ہو نے کی اطلاعات موصول ہو ئی ہیں البتہ نوجوانوں کی جانب سے بھارتی فوج پربھی حملہ کیا گیا جس میں تین اہلکار زخمی ہوگئے اور ایک اہلکار کی حالت نازک بتائی جارہی ہے۔
واضح رہے کہ بھارتی فوج کی کشمیری علاقوں میں روزانہ کی بنیاد پر جارحانہ کارروائیوں میں اب تک صرف دس دنوں میں شہید ہونے والوں کی تعداد 17 ہوگئی ہے جبکہ درجنوں افراد بھارتی دہشت گردی کے ہاتھوں حراست میں لیے جا چکے ہیں۔