(روز نامہ قدس ۔آنلائن خبر رساں ادارہ ) فلسطینی اتھارٹی نے مطالبہ کیا ہےکہ مقبوضہ فلسطین میں صیہونی ریاست کے سنگین جرائم اور انسانی حقوق کی بدترین خلاف ورزیوں پر اقوام متحدہ نوٹس لے۔
فلسطینی وزارت خارجہ کی جانب سے فلسطینیوں کے خلاف جنگی جرائم، اسرائیلی توسیع پسندی، گھروںپر قبضے، املاک کی مسماری ، کھیتوں اور باغوں کو تباہ کرنا اور فلسطینیوں کو جبری طورپر ان کے اپنے گھروں سے ہجرت پر مجبور کرنے جیسے سنگین جرائم پر گذشتہ روز اقوام متحدہ کی سلامتی کونسل سے مطالبہ کیا ہے کہ وہ فلسطین پرقابض صیہونی ریاستی کو اخلاقی اورقانونی طور پر قصور وار ٹھراتے ہوئے انصاف کے کٹہرے میں لائے۔
جاری کردہ بیان میںکہا گیا ہے کہ فلسطینیوں کے خلاف صیہونی ریاست کے جرائم بین الاقوامی اصولوں کے مطابق خطےمیں قائم امن کی کوششوں کو تباہ کرنے کا باعث بن رہے ہیں، خاص طور پر دو ریاستی حل کی راہ میں سب سے بڑی رکاوٹ ہیں۔
فلسطینی وزارت خارجہ کا کہنا ہے کہ مقبوضہ فلسطین میں غیر قانونی صیہونی آبادکاری ہر طرح سے بین الاقوامی قانون کے تحت جرم ہے اور یہ جرم مزید بڑھ کر انسانیت کے خلاف جرائم کادرجہ اختیار کرچکا ہے، اس لے بین الاقوامی قوانین کے تحت اسرائیل کا محاسبہ ضروری ہے، انہوں نے بین الاقوامی برادری پراور عالمی فوجداری عدالت پرزوردیا کہ وہ فلسطینیوں کی زمینیں غصب کر نے اور ان پریہودیوں کو آباد کرانے کا سلسلہ بند کرائے۔